2G-ге телмірген ауылдар аз емес

Жыл бұрын цифрлық даму, инновациялар және аэроғарыш өнеркәсібі экс министрі Бағдат Мусин халықаралық зерт­теулерге сүйене отырып, біздің ел интер­нет сапасы бойынша Токионы басып озғанын мәлімдегенде, сала маманы түгілі, қарапайым адамдар да күдік келтірді. Өйткені жұмыс сапа­рымен шалғай аудандарға барғанда талай мәрте ғаламторға қол жеткізе алмай қаны­мыз қайнаған еді. Өкінішке қарай, қараша халықтың жүйкесіне ши жүгірткен мәселені шешу жұмыстары баяу іске асырылып жатыр.

Жарты жыл бұрын өңірде 50 елді мекен тұрғын­дары 2G қуа­­тын­дағы интернетке тәуел­ді болса, жыл соңында бұл көр­сет­кіш 4-ке азайыпты. Оған да шүкір дейміз ғой. Алайда бұл мақтануға тұра­тын көрсеткіш пе?  Жалпы, 2G қуатындағы байланыс­ты интернет деп айтуға бола ма, болмай ма?

«Өңірдің 367 елді мекені интернетпен қамтамасыз етіл­ген. 46 ауыл (12,5 пайыз) 2G қуа­тын­да­ғы байланысқа қосыл­ған болса, 63 елді мекен 3G санатындағы интернетті пайдаланып отыр. Ал облыс аумағындағы 258 елді мекен жоғары жылдам­дық­ты 4G мобильді интернет желісіне қосылған», дейді облыс­тық цифр­­ландыру және архивтер бас­қар­масының басшысы Руслан Ноқрабеков.

Жалпы алғанда тұтынушы ретінде 2G қуатындағы интернет пен 3G санатындағы ғаламтор арасында ауыз толтырып айтар­лық­тай айырмашылық бар деу­ге келмейді. Кейбір жерлерде 3G-мен интернетке кіру де мех­­­нат­­қа айналатыны белгілі. Қыс­қа­сы, екеуін қоса есеп­тегендегі көрсеткіш 29,7 па­йызды құрайды екен. Ал жоғары жылдамдықты 4G мобильді байланысы өңір бойынша 70,3 па­йызға тең.

«Өңір бойынша 199 елді мекен тал­шықты-оптикалық байланыс желісімен қамтылған болса, 172 елді мекен қамта­масыз етілмеген. «Қолжетімді интернет» ұлттық жобасы аясында 2023–2027 жылдары өңір елді мекендерінің қолжетімді интернет желісіне және байланысқа қолжетімділігін қамтамасыз ету жөніндегі жол картасына сәйкес 2025–2027 жылдары 198 ауылдағы мобильді интернет желісінің сапасын 4G-ге арттыру көзделген.

Сондай-ақ 28 елді мекенді жергілікті атқа­рушы орган тарапынан электр желі­лері мен антенна-діңгек құрылысымен қамтамасыз ету бойынша жұмыс атқары­лады. Сонымен қатар 170 елді мекенді тал­шықты-оптикалық байланыс желісімен және рес­публикалық, об­лыстық маңыздағы жолдарды цифр­лық инфрақұрылыммен қамтамасыз ету үшін 2024–2025 жылдары 12 антенна діңгек орнату көзделген», дейді жауапты басқарма басшысы.

Басқарма басшысы келтірген дерекке жүгінсек, өңірдегі елді мекендерді 100 пайыз 4G сана­тын­дағы ғаламтормен және тал­шықты-оптикалық байланыс же­лі­сімен қамтамасыз ету жұмыс­­та­ры 2027 жылы мәресіне жететін көрінеді.

Айшылық алыс жерлерден жылдам хабар алғызатын сапалы интернетке зәру ауылдар еліміз бойынша да аз емес. Жарты жыл бұрын Үкімет отырысында сөз алған Цифрлық даму, инновация­лар және аэроғарыш өнеркәсібі министрі Жасұлан Мәдиев атқа­ры­лып жатқан жұмыстар жайын­да есеп берген кезде өзекті мәселеге қа­тысты өз ойымен бөлісіп, жағ­дай­ды баяндағаны бар.

Министр келтірген мәліметке сүйенсек, жарты жыл бұрын еліміз бойынша мо­бильді интернетке қол жеткізе алмай отыр­ған 1 424 ауыл анықталған. Әрине, одан бері біршама уақыт өтті. Көрсеткіш ша­ма­лы болса да азайған болар. Кім білсін...

«Айта-айта Алтайды, Жамал апа қартайды» демекші, елді ме­кен­дерді сапа­лы интернетпен қам­тамасыз ету жұмыс­та­ры жыл сайын тоқтаусыз жүргізілгеніне қара­­мастан, көрсеткіш көңіл көн­­шітер емес. Өңірде 2 G қуатындағы байланысқа телмірген 46 ауыл бар. Ал жауапты бас­қарма басшысы облыс аумағындағы елді мекен­дерді 100 пайыз сапалы ғаламтормен қамтасыз ету тек 2027 жылы мүм­кін болатынын айтып отыр. Соған қарағанда қараша халық тағы да үш жыл шыдауы керек. Тек шыдамның шегі үзілмесе бол­ғаны...

Жамбыл облысы