Санжар Тәшкенбай (48 кг) мен тәжікстандық Мехрон Шафиев кездесті. Екі боксшы да барын салып айқасты. Десек те басымдық біздің жігіт жағында болды. Ол екінші раундта қарсыласын есеңгіретіп те тастады. Жеңіс Санжардың еншісіне жазылды. Сәкен Бибосынов (51 кг) ойда жоқта өзбекстандық Асылбек Жәлиловтен жеңілді. Махмұд Сабырхан (54 кг) шриланкалық Жаянат Құмарды айқын басымдықпен ұтты. Бұл жекпе-жек екінші раундта тоқтатылды. Мұхамедсабыр Базарбайұлы (63,5 кг) таиландтық Сомчай Вонгсуваға жол берді. Сағындық Тоғамбай (92 кг) Өзбекстанның қазағы Мадияр Сайдрақымовпен жұдырықтасты. Бұл бәсекеде Сағындықтың бағы жанды.
Жартылай финалдық сайыстарды қыздар бастады. Бұл бәсекелерде Виктория Графеева (60 кг) таиландтық Порнтип Буапты мерзімінен бұрын ұтса, Аида Әбікеева (63 кг) тағы бір жергілікті боксшы Тхананя Сомнуекке сан соқтырды. Наталья Богданова (70 кг) украиналық Анастасия Черноколенконы, Гүлсая Ержан (81 кг) өзбекстандық Сохиба Рузметованы ұпай санымен жеңді. Сонымен қатар аса ауыр салмақта спортшылардың аз болғанына байланысты Елдана Тәліпованың бірден финалға жолдама алғанын естеріңізге сала кетейік. Өкінішке қарай, Әйгерім Сәттібаева (48 кг) Фарзона Фозиловаға (Өзбекстан), Жазира Орақбаева (52 кг) Феруза Қазақоваға (Өзбекстан), Ұлжан Сәрсенбек (57 кг) Пунрави Руенроске (Таиланд), Милана Сафронова (66 кг) Навбахор Хамидоваға (Өзбекстан), Диана Магауяева (75 кг) Лина Ванға (Қытай) жол берді. Қорытындысында бес қызымыз қола медальды қанағат тұтты.
Ерлер арасындағы жартылай финал кеше өтті. Бұл межеде Санжар Тәшкенбай (48 кг) Кадзума Аратакені (Жапония), Махмұд Сабырхан (54 кг) Саравут Суктхетті (Таиланд), Оразбек Асылқұлов (57 кг) Лундаа Гантумурды (Моңғолия), Дулат Бекбауов (67 кг) Шукрат Саломатовты (Тәжікстан), Абылайхан Жүсіпов (71 кг) Шохобжон Шүкіровті (Тәжістан), Диас Молжігітов (75 кг) Павел Илюшаны (Украина), Бекзат Нұрдәулетов (86 кг) Даниил Жасанды (Украина), Сағындық Тоғамбай (92 кг) Таймиао Люді (Қытай), Айбек Оралбай (+92 кг) Жахонгир Зокировті (Өзбекстан) ұтты. Ал Ерасыл Жақпеков (80 кг) Тұрабек Хабибуллаевқа (Өзбекстан) есе жіберді. Осылайша, тоғыз жігітіміз финалдық сайысқа жолдама алды. Бас жүлдеге тартыс 11 желтоқсанда өтеді.
