Солтүстікқазақстандық оқушы Азия чемпионы атанды

ПЕТРОПАВЛ. 17 маусым. Облыстық спортқа мамандырылған мектеп-интернаттың оқушысы Евгений Горбузняк грек-рим күресінен Азия чемпионы атағын жеңіп алды. Бұл туралы облыстық дене шынықтыру және спорт басқармасының мамандары хабарлады. Евгений Қарағанды облысының Саран қаласында туған. Грек-рим күресімен жастайынан айналысып келеді.  Спорт шеберінің кандидаты.  Ел және халықаралық жарыстардың бірнеше мәрте жеңімпазы. Оны тәжірибелі жаттықтырушы С. Құсайынов жаттықтырады. 11-14 маусым аралығында Үндістанның Нью-Дели қаласында жасөспірімдер арасында өткен Азия чемпионатында ол 85 килоға дейін салмақта Қазақстанның намысын абыроймен қорғады. Барлық қарсыласының жауырынын жерге тигізіп, алтыннан алқа тақты. Қазақстан құрамасының белді мүшесін жерлестері вокзал басында құшақ-құшақ гүлдермен қарсы алды. Өмір Есқали. Дерек: Солтүстік Қазақстан облыстық дене шынықтыру және спорт басқармасы. Сурет: egemen.kz