Музыкалық аспап асынған Қимақ жауынгері киімінің жаңғыртпасы 2012–2014 жылдары қалпына келтірілген. Ескерткіштердің бірегейлігі сол, жерленген жауынгерлермен бірге жібек матадан тігілген киімдердің қалдықтары, қару-жарақ, ат әбзелдері және үш бірдей музыкалық аспап табылған.
VIII ғасырдың жауынгер-музыкантының киімін, сауыт-саймандарын және қару-жарағын ғылыми тұрғыда археолог Зейнолла Самашев пен суретші, этнограф-қарутанушы Қалиолла Ахметжан қалпына келтірді. Костюм жиынтығын дайындау кезінде ортағасырлық көшпелілердің киімін тігу және пішу әдістеріне барынша жақын технология қолданылып, қимақтардың киіміне тән ерекшеліктер көрсетілді.
Жауынгердің үстіндегі киімі сары, жеңі қызғылт түсті жібек матадан тігіліп, толықтай ою-өрнекпен көмкерілген. Белдіктің алтын жапсырмалары түгелдей Қарақаба обасынан табылған артефактілер негізінде жасалыпты. Жауынгердің басына темірден тоқылған, шынжыр торлы мойын сауытпен біріктірілген дулыға киілген. Дулығаның жоғарғы жағында кішкентай қызыл түсті жалауша орнатылған. Бұл жауынгердің әлеуметтік мәртебесі мен әскери лауазымын көрсетуі мүмкін. Сондай-ақ шайқас кезінде айрықша белгі ретінде қолданылған. Мұндай элементтер көшпелілердің әскери мәдениетінде жиі кездескен. Жауынгердің қолында екі ішекті домбыраға ұқсайтын музыкалық аспап бар. Бұл оның жауынгер ғана емес, музыкант болғанын да көрсетеді. Белінде белдікке байланған қысқа қылыш және қосымша жабдықтары бар. Бейненің ерекшелігі – көшпелі мәдениеттің, тұрмыс пен өнердің үйлесімін бейнелеп, сол дәуірдің тарихи болмысын нақты көрсетеді.
Шығыс Қазақстан облысы
