Астана қаласы әкімінің орынбасары Есет Байкен турнирдің ашылуымен құттықтап, қатысушыларға сәттілік тіледі. Үзеңгілес достары, қаламгерлер қауымы ақиық ақын туралы естеліктер айтты. Аталған іс-шараға бастамашы болған сенатор, Қаныш Сәтбаев атындағы халықаралық қордың Қамқоршылық кеңесінің төрағасы Алтынбек Нухұлы атап өткендей, ақынның артында қалған мол мұрасын көпшілікке насихаттау аса маңызды.
– Қазақтың ғұламасы, академик Қаныш Сәтбаевтың 125 жылдығы аясында осы тұлғаның алып болмысын тамаша сомдаған «Қаныш» поэмасының авторы, ақын Несіпбек Айтұлын еске алу кешін ұйымдастыруды жөн көрдік, – деді Алтынбек Нухұлы.
Әріптесіміз, «Egemen Qazaqstan» газетінің фототілшісі Ерлан Омаров турнир жеңімпазы атанып, бірінші орынға, Несіпбек Айтұлы атындағы жүлдеге ие болды. Екінші орынды, Мұқағали Мақатаев атындағы жүлдені Сенат депутаты Амангелді Толамисовке бұйырды, үшінші жүлделі орын, Мұзафар Әлімбаев атындағы жүлде Л.Н.Гумилев атындағы Еуразия ұлттық университетінің фотографы Ербол Сейітханұлына бұйырды.
Қаныш Сәтбаев атындағы жүлдені еңбек ардагері Оңдасын Мейірбаев, Медеу Сәрсеке атындағы жүлдені Қазақстанның еңбек сіңірген қайраткері Аяған Сандыбай, Кәкімбек Салықов атындағы жүлдені ардагер журналист Әлімжан Сабыржанұлы, Нұртас Оңдасынов атындағы жүлдені Қазақстанның еңбек сіңірген қайраткері, белгілі актер Нартай Сауданбекұлы иеленді. Бұған қоса бес жүлде – «Алғашқы шар», «Мерген ойыншы», «Шебер ойыншы», «Мәдениетті ойыншы», «Үздік дуплет» аталымдарының иегерлері де анықталды. Жарыс жеңімпаздары мен жүлдегерлеріне арнайы сый-сияпат табысталды. Турнирдің бас төрешісі ұлттық дәрежедегі төреші, белгілі спорт журналисі Несіп Жүнісбайұлы болды.
