Елбасы халықты Қазақстан халқының бірлігі күнімен құттықтады

АСТАНА. 1 мамыр. Бүгін Қазақстан халқының бірлігі күні мерекесіне орай еліміздің барлық жерінде арнайы іс-шаралар өтуде. Астана қаласында «Қазақ Елі» монументі алдындағы алаңда «Нұрлы жол – жеңіс жолы» атты мерекелік шара ұйымдастырылды. Оған Мемлекет басшысы Нұрсұлтан Назарбаев қатысып, халықты мерекемен құттықтады. Бұл туралы akorda.kz хабарлады. Елбасы Қазақстан халқын мерекемен құттықтап, өткен сайлауда ел азаматтары күш-жігері мен бірлігін бүкіл әлемге танытқанын атап өтті. «Көпэтносты халықтың тұтастығы мен тұрақтылығы арқасында Қазақстан зор табыстарға жетті. Ел алдында тұрған міндеттерді орындау үшін бірлікті сақтау керек», – деді Нұрсұлтан Назарбаев. Сондай-ақ, Қазақстан Президенті көрсеткен сенімі мен қолдауы үшін барша халыққа алғысын білдірді. «Мені қолдаған барлық қазақстандықтарға алғыс айтқым келеді. Маған осы күндері еліміз бен әлемнің сан тарапынан, түрлі сала өкілдерінен мыңдаған құттықтау хаттар мен жеделхаттар, телефон қоңыраулары келіп түсуде. Бәріне үлкен рахмет айтамын. Осындай халыққа қызмет ету – ұлы мәртебе. Мен өзімді осы жұмысқа арнаған адаммын және Қазақстанның алға ілгерілеуі үшін, бізді бүкіл әлем құрметтеуі үшін және ел алдында тұрған міндеттерді табысты жүзеге асыру үшін бәрін жасайтын боламын. Біз мұны елдің және болашақ ұрпақтың алдындағы парызымызды орындадық деп айту үшін атқаруға тиіспіз», – деді Мемлекет басшысы. Соңында Нұрсұлтан Назарбаев барша қазақстандықтарға бақ-береке және табыс тіледі. Мерекелік шара аясында концерттік бағдарлама өтіп, оған Қазақстанның эстрада жұлдыздары, елордалық және өңірлік этномәдени бірлестіктер өкілдері, сондай-ақ, республиканың шығармашылық ұжымдары қатысты. Алаң аумағында этноауыл құрылып, елорданың ғана емес, елдің басқа қалаларының да этномәдени бірлестіктері өз ұлтының мәдениетін, болмысын, достық дәстүрі мен қонақжайлығын паш етті. Еламан Қоңыр. Дерек, сурет: akorda.kz.