Шаттыққа толы іс-шараға қатысқан оқушылар мерекелік киімі мен кейіпкерлік келбеті жағынан бірінен-бірі өтеді. Әсіресе олардың арасындағы солтүстікқазақстандық 10 жастағы Әли Құдияровтың образы анадайдан өзіне еріксіз көз тартады. Әли – Солтүстік Қазақстан облысы, Ақжар ауданы Күлкөл ауылының Қ.Хадесов атындағы орта мектебінің оқушысы. Бұл мерекелік іс-шараға киіп келген «Өмір ағашы» костюмін өзінің анасы арнайы тігіп берген екен. Балақайдың үстіндегі «Өмір ағашы» костюмінің ең алдымен көзге түсетіні – алып бұтақтары. Ағаштың діңі ретінде жалғасқан костюмінің кеуде тұсына жеті атасы тізілген өз әулетінің шежіресі жазылған.
Ал арнаулы әлеуметтік қызметтерге мұқтаж балаларды қолдау орталығының тәрбиеленушісі ақмолалық Дарья Дячишина Президентке жаңажылдық шыршаға шақырғаны үшін алғысын білдірді. Киокушинкай каратэмен шұғылданатын оның жетістіктері көп.
«Бүгін Жаңа жыл шыршасына қатысу менің өмірімдегі ең ерекше сәт, ұмытылмас үлкен оқиға болды. Мен көптеген сыйлық алдым, керемет шоудың куәсі болып, өзге өңірлерден келген өзім құралыптас балалармен таныстым. Президентке және ұйымдастырушыларға осы таңғажайып мерекені сыйлағаны үшін шексіз алғыс айтамын», дейді Дарья.
Мерекелік іс-шарада әр балаға Мемлекет басшысы Қасым-Жомарт Тоқаевтың атынан құттықтау ашықхаттары табыс етілді.
«Айналайын балақай! Сені Жаңа жыл мейрамымен құттықтаймын! Осы жарқын мереке өзіңді шаттыққа бөлесін! Әрдайым жаңашылдыққа, жасампаздыққа ұмтыл! Білімпаз, озат әрі зерек болып, жақындарыңды қуанта бер! Арманың асқақ, қиялың ұшқыр болсын! Саған зор денсаулық, баянды бақыт тілеймін!» делінген Президент құттықтауында.
Ал мерекелік іс-шараға қатысқан Оқу-ағарту министрі Ғани Бейсембаев мектеп оқушыларымен бірге шырша шамын жақты.
«Бүгін әсем елордамызға еліміздің түкпір-түкпірінен келген 100-ден аса бала жиналды. Бұл күндері сіздер қаланың көрікті жерлерін аралап, еліміздің жетекші оқу орындарында болдыңыздар. 2024 жыл, расында, сіздер үшін жетістіктер мен жақсы жаңалықтарға толы жыл болды. Сіздердің араларыңызда білімімен үздік атанғандар, жарыстар мен байқауларда оза шапқандар да бар, сондай-ақ сіздер биылғы жылы жетістіктермен бірге жаңа достар таптыңыздар. Әрқайсыларыңыздың жетістіктеріңіз еліміздің болашағына қосылған маңызды үлес деп білемін. Мемлекет сіздердің бақытты балалық шақтарыңыз бен жарқын болашақтарыңыз үшін барлық жағдайды жасап келеді. Ал сіздердің міндеттеріңіз – осы мүмкіндіктерді пайдаланып, жақсы оқу және жан-жақты даму, осылайша еліміздің адал да жауапты азаматы болып өсу», деді Ғ.Бейсембаев.
Елорданың үздік шығармашылық ұжымдарының әртістері мен қойылымдар балаларға мерекелік атмосфера сыйлады. Еліміздің танымал әртістері көңілді ән шырқап, балалар шыршаны айнала биледі. Осы республикалық шарша тойына дейін еліміздің әр қиырынан келген балаларға Астананың көрікті жерлеріне, оның ішінде театрға, кинотеатрға және мұражайларға экскурсия ұйымдастырылды. Ал ең қызықты сәттердің бірі – іс-шара соңында әр балаға Мемлекет басшысының атынан жаңажылдық сыйлық тарту етілді.
