«Солтүстікқазақстандық Кеңес Одағының батырлары» кітабы жарық көрді

ПЕТРОПАВЛ. 1 мамыр.  Облыстық мұрағат Жеңістің 70 жылдығы қарсаңында  «Солтүстікқазақстандық Кеңес Одағының батырлары»  атты жинақты оқырмандарға ұсынды. Бұл туралы egemen.kz тілшісі хабарлады. Кітаптың таныстырылымында сөйлеген сөзінде облыс әкімінің орынбасары  Анархан Дүйсенова   кешегі қырғын шайқастардағы  боздақтардың ерліктерін татулықта, бірлікте өмір сүріп жатқан қазақстандықтар ешқашан ұмытпайтынын, отаншылдықтың өшпес белгісі ретінде бағалайтынын жеткізді. «Мұрағаттық құжаттарға негізделген басылымға 55  Кеңес Одағының Батырлары мен және  11 Даңқ орденінің  толық иегерлері енген.  Материалдар Ресей, Беларусь,  республикалық, облыстық мұрағаттардан   жиналды.  Әр жерлесіміздің марапат парақшалары, майданнан жазылған хаттар, мақалалар,  естеліктер топтастырылған.  Студент-жастар  үшін өте пайдалы құрал болары анық», - дейді облыстық мұрағаттың директоры Сәуле Мәлікова. Жинақ қазақ және орыс тілдерінде жарық көрді. Өмір Есқали. Дерек, сурет:  Солтүстік Қазақстан облыстық мұрағаты.