Коллажды жасаған – Амангелді Қияс, «EQ»
Облыстық Энергетика және тұрғын үй-коммуналдық шаруашылық басқармасының басшысы Бердібек Картбаевтың айтуынша, 2025 жылғы 1 қаңтардан бастап «электр энергетикасы туралы» заңға енгізілген өзгерістер аясында соңғы тұтынушыларға электр энергиясын сатумен айналысатын энергиямен жабдықтаушы ұйымдар таратылады. Бұдан былай олардың функциясын энергия беруші ұйымдар орындайды.
«Облыста 2025 жылдан бастап энергиямен жабдықтаушы ұйымның міндеттерін тиісті лицензия алған «Маңғыстау өңірлік электржелілік компаниясы» акционерлік қоғамы, яғни МӨЭК энергия беруші ұйымы өз мойнына алады. Бұрын тұтынушыларға қызмет көрсеткен «Маңғыстау жарық» ЖШС электрмен жабдықтау қызметін тоқтатады. Энергиямен жабдықтауға байланысты барлық қызмет бір ұйым арқылы ұсынылады. Бұл өзара іс-қимыл үдерісін жеңілдетеді және кез келген түйткілді тез шешуге мүмкіндік береді», деп түсіндірді Бердібек Картбаев.
«Маңғыстау өңірлік электржелілік компаниясы» АҚ төрағасы Қасымхан Сыздықовтың сөзінше, тұрмыстық тұтынушыларға байланысты өзгеріс аз болады. Тұрмыстық тұтынушылар электрмен жабдықтаудың үлгілік шарты негізінде электр энергиясын алуды жалғастырады.
«Біздің кәсіпорынның басымдықтарының бірі – оның барлық қызметінің жариялылығы мен ашықтығы. Акционерлік қоғам өңірді үздіксіз әрі тұрақты энергиямен жабдықтау жөніндегі өз міндетін толық түсініп, тұтынушылармен ашық диалог форматында қарым-қатынас орнатады. Компания электр энергиясымен қамтамасыз ету бойынша міндеттерді өз мойнына алып қана қоймай, жыл сайын өңір инфрақұрылымын дамытуға қатысты белсенді жұмыс істеп келе жатыр. Осы жұмыс аясында біз желілерді жаңғыртумен, озық технологияларды енгізумен және энергия жүйесінің сенімділігін арттырумен айналысамыз», деді Қасымхан Сыздықов.
Жұмыс орындарын сақтау мақсатында «Маңғыстау жарық» ЖШС қызметкерлері МӨЭК штатына біріктірілмек.
«Өңірдегі әлеуметтік тұрақтылықтың маңызын түсінеміз. Жұмыс орындарын сақтау – қызметкерлерді қолдау ғана емес, сонымен қатар қоғамның тұрақты дамуына қосылған үлес», деді Қасымхан Сыздықов.
«Маңғыстау жарық» ЖШС бас директоры Айдос Әбенов қаңтардың басында алынған «Маңғыстау жарық» түбіртектерінде көрсетілген бұрын жинақталған берешек және ағымдағы есептеулер бойынша электр энергиясы үшін төлемді белгіленген тәртіппен МӨЭК атына жүргізу қажет екенін түсіндірді. «Тұтынушыларға ыңғайлы болу үшін және қате төлемдер жағдайларын болдырмау үшін, сондай-ақ МӨЭК алдындағы кредиторлық берешекті ескере отырып, тұтынушылардың дебиторлық берешегін «Маңғыстау өңірлік электржелілік компаниясы» АҚ-ға беру туралы бірлескен шешім қабылданды» деп түсіндірді Айдос Әбенов.
Жаңа жыл қарсаңында жеткен жаңалық осындай. Енді өндірушіден электр энергиясын тұтынушыға дейін жеткізу және түрлі қажеттілікке орай желілерде айыру-қосу жұмыстарын жүргізу, есептегіштерді тексеру, өзге де электрді тасымалдау мен жабдықтауға қатысты ірілі-ұсақты жұмыстардың бәрі сенімді бір қолға өтті.
«Делдалдардың электр энергиясын тасымалдаушы нарығынан кетуін қолдап, тиісті министрліктерге шағымданған едік. Даулы мәселе төңірегінде халық арасынан табыла білген «Egemen Qazaqstan» газетіне де алғысымыз шексіз. Әрине, тегін ештеңе жоқ, тұтынған қызметтің ақысын төлеуге міндеттіміз. Бірақ екі ортада халық есебінен ақша табатындарға шектеу болуға тиіс», дейді Сайын аулының тұрғыны, қоғам белсендісі Сырғалай Меңдібай.
Маңғыстау облысы
