Жиын барысында жергілікті депутаттар өңірдің әлеуметтік-экономикалық дамуына қатысты өзекті мәселелерді көтеріп, бірқатар маңызды ұсыныстарын ортаға салды.
Атап айтқанда, Құмкөл мұнай-газ кен орнын Ұлытау облысына қарасты етіп, пайдалы қазбалардан түсетін салықтың 50 пайызын облыс бюджетіне бағыттау, Жошы хан тарихи-мәдени кешенін мемлекет балансына беріп, Мәдениет және ақпарат министрлігінің құзырына өткізу мәселелері айтылды.
Жезқазған қалалық мәслихатының төрағасы Раушан Қапарова мәдени кешенді қаржыландыруға жергілікті бюджеттен бөлінетін қаражаттың жеткіліксіздігін атап өтті. Осыған орай нысанды республикалық деңгейде қаржыландыру ұсынылды.
Өз кезегінде Ерболат Сатыбалдин бұл ұсыныстардың Мәжілісте қарастырылып жатқанын және тиісті шешімдер қабылданатынын атап өтті. Сондай-ақ депутат өңірдің әлеуметтік-экономикалық дамуына қатысты мәселелерді шешу бағытында нақты жұмыстар жүргізілетінін айтты.
