100-ге келген миллиардер Дэвид Рокфеллер 6-рет жүрегін ауыстырды

АСТАНА. 1 мамыр. Белгілі миллиардер, алдағы шілдеде 100 жасқа толатын Дэвид Рокфеллер өмірінде 6-рет жүрек трансплантациясын жасатты. Бұл туралы Word News Dally Report басылымы хабарлады. 6 сағатқа созылған отаны Нью-Йорктегі Рокфеллер әулетіне тиесілі Покантико-хилл сарайында миллиардерлердің жеке хирургтарынан құрылған топ жасады. Отадан кейінгі қайта қалпына келу кезеңі Тынық мұхитының ортасындағы Вануату аралында өтеді. Операциядан кейін 36 сағат уақыт өткенде Дэвид Рокфеллер журналистерге өзіне бірнеше сұрақ қоюға рұқсат берген. «Жүрегімді ауыстырған сайын, бүкіл денеме қан жүгіріп, өмірдің бір тамшысындай болған тылсым күш бойыма қуат бергенін сезінемін. Сол кезде өзімнің тірі және белсенді екенімді білемін», – дейді миллиардер. Ұзақ өмір сүрудің құпиясы туралы сұраққа Рокфеллер: «Маған бұл сұрақ жиі қойылады. Бәріне берер жауабым бірдей. Яғни, ұзақ жасаудағы бар сырым – менің өмірге деген махаббатым, оны шексіз сүю. Қарапайым өмір сүру, жас балалармен бала болып ойнау, қолыңда бар дүниеге қанағат ету, уақытыңды сыр бөлісер достарыңмен өткізу. Міне, менің өмірімнің негізгі формуласы осындай», – деді. Ол өз өмірінде өте көп ақша тауып, байлыққа кенелгенін, алайда, дүниесінің көп бөлігін қайырымдылыққа бергенін айтты. «Байлығыңды өзгелермен бөлісу мүмкіндігіне ие бола тұра, оны өзіңде қалдыру – мағынасыз тірлік», – дейді Дэвид Рокфеллер. Айта кетейік, миллиардер алғаш рет жүрегін 1976 жылы ауыстырған. Ол кезде көлік апатына ұшырауы себеп болған. Аталған апаттан кейін 24 сағат уақыт өткенде Рокфеллерге жүрек трансплантациясы жасалды. Ал бір аптадан кейін ол баяу болса да жүгіре алатын халге жеткен. Сонымен қатар, 1998 және 2004 жылдары миллиардер бүйрегін ауыстырғанын айта кетейік. Бүгінде 100-ге келген Дэвид Рокфеллер өзін жақсы сезінетінін және денсаулығына ешқандай шағымы жоғын айтты. Тіпті ол мұндай денсаулықпен 200 жасқа дейін өмір сүретініне үмітті екенін де әзілмен астарлап жеткізді. Дэвид Рокфеллер 1915 жылдың 12 шілдесінде Нью-Йорк қаласында туған. Ол - әлемдегі ең алғашқы миллиардер Джон Рокфеллердің немересі. Еламан Қоңыр. Дерек: Word News Dally Report. Сурет: bloomberg.com.