Батыс Қазақстанда жастардың 60 пайызы әскерге жарамсыз

ОРАЛ. 30 сәуір. Батыс Қазақстан облысында көктемгі әскерге шақырту науқаны нәтижесі бойынша әрбір екінші жеткіншек денсаулығына байланысты әскери қызметке жарамсыз болып шықты. Бұл туралы egemen.kz тілшісі хабарлады. Орал қалалық қорғаныс істері жөніндегі бөлімнің меңгерушісі Марат Тұқпаевтың айтуынша, соңғы үш жылдың ішінде әскерге шақырылушылар арасында көз көру жүйесінің нашарлауы көптеп кездесуде. «Шамамен әскерге шақырылушылардың 60 пайызы әскери қызметке жарамсыз. Соңғы үш жылда дәрігерлік комиссияның айқындауынша, жастар арасында көз көру жүйесінің әлсірегені байқалады. Мамандар оның себебін мониторға немесе смартфон мен планшет дисплейіне көп үңілумен түсіндіреді. Уақыт өткен сайын денсаулығына байланысты әскерге жарамсыздар қатары күрт көбеюде. Бұл жан түршігерлік динамика», – дейді Марат Тұқпаев. Сондай-ақ, ол көз көру жүйесімен қатар, жүрек, қан айналым аурулары да жастар арасында көп кездесетінін айтты. Бұл жөнінде ол: «Бұған сену қиын, алайда, жастардың қатарында қан қысымы 140-тан 180-ге дейін  жеткендері жетіп артылады. Ең басты қауіп, бұл келеңсіздіктің жаппай көрініс табуында. Мені осы жағы қатты қобалжытады. Бұл жай ғана статистика емес, осындай көрсеткіш жылдан жылға артып келеді. Жас жігіттеріміздің денсаулығы – ұлттың денсаулығы! Болашақ ұрпаққа елімізді аман-еен аманаттау үшін осы мәселеге аса мән беруіміз қажет», – дейді Марат Бақытжанұлы. Темір Құсайын. Дерек: egemen.kz. Сурет: newskaz.ru.