Фото: Polisia.kz
Павлодар облысы полиция департаментінің өкілдерінің айтуынша кинологиялық қызметте 20 қызметтік ит бар, олар – нағыз кәсіпқойлар, олардың қызметі жоғары концентрация мен физикалық төзімділікті талап етеді. Иттер – заттарды іздеуден бастап қылмыскерлерді ұстауға дейінгі тапсырмаларды бұлжытпай орындайды. Алайда, бұған дейін ұзақ әрі қажырлы дайындық жұмыстарынан өтеді.
Бүгінде Павлодар полициясының кинологтарының қарамағында оқу-жаттығу сыныптары, үлкен жаттығу алаңы және заманауи оқшауланған жылы вольерлерден тұратын арнайы кешен бар. Орталықтағы әр иттің жеке вольері, теңдестірілген тамағы және жұмысқа қажетті энергия беретін дәрумендер кешені қарастырылған. Мұндай жан-жақты қамқорлық иттердің жоғары тиімділікпен жұмыс істеуін қамтамасыз етеді.
Polisia.kz-тің хабарлауынша Павлодар облысында 2024 жылдың өзінде қызметтік иттердің көмегімен 258 қылмыс ашылған. Олар есірткі іздеу бойынша 446 рет қолданылып, шамамен 40 келі есірткі затын анықтауға және тәркілеуге мүмкіндік берген.
