Аталған тележобаға Мәдениет және ақпарат министрлігі, Оқу-ағарту министрлігі, Ғылым және жоғары білім министрлігі мен Парламент Мәжілісі қолдау көрсетіп отыр.
Интеллектуалдық ойын – еліміздің болашақ көшбасшыларын тәрбиелеуге бағытталған жастар қозғалысы. Қазіргі уақытта жүздеген дарынды оқушы шақыртуды қабылдап, ойынға қатысуға дайындалып жатыр. Әр облыстағы іріктеу кезеңдері былтыр қазан айында басталып, наурызға дейін жалғасады. Өңірлерден іріктелген ең үздік бес оқушы сәуір-маусым аралығында өтетін республикалық кезеңге қатыса алады.
Айта кетейік, жас дарындардың білімдері мен қабілеттерін халыққа көрсетуге мүмкіндік беретін телевизиялық жоба «Хабар» агенттігінің 30 жылдығына орай өткізіліп отыр. Ең үздік үш жеңімпазға еліміздің жоғары оқу орындарында оқуға гранттар табысталады.
Бүгінде Павлодар, Қарағанды, Абай, Ақмола, Түркістан, Жамбыл, Батыс Қазақстан, Шығыс Қазақстан, Ұлытау, Қызылорда, Атырау және Маңғыстау облыстарынан, сондай-ақ Астана мен Шымкент қалаларынан республикалық турға қатысатын үздік бестіктер анықталып үлгерген. Алматы, Ақтөбе, Жетісу, Солтүстік Қазақстан, Қостанай облыстарында және Алматы қаласында іріктеу кезеңдері қаңтар-ақпан айларында өтеді.
«XXI ғасыр көшбасшысы» – жас дарындарға жаңа мүмкіндіктер беретін бірегей алаң. Интеллектуалдық ойын білімді әрі талантты жастарды қоғамға таныстырып қана қоймай, шалғай елді мекендерден шыққан дарынды жасөспірімдер үшін таптырмас мүмкіндік екені сөзсіз.
Еске салсақ, тележоба алғаш рет 25 жыл бұрын экранға жол тартқан еді. Осы уақыт ішінде отандық телевизиядағы үздік жобалардың бірі ретінде танылды. Бүгінде білімділер сайысына қатысқан көптеген жас өз жолдарын тауып, түрлі салаларда кәсіби маманға айналды.
