Сурет: primeminister.kz
Былтыр жалпы құны 1,9 трлн теңгені құрайтын 86 инвестициялық жобаны іске асыру жөніндегі бес жылдық бағдарлама шеңберінде өңірде 411 жаңа жұмыс орны ашылған. Жалпы, 37 млрд теңгеге 21 жоба іске асырылған. Оның ішінде 6 жоба құрылыс материалдарын өндіру бойынша, 10 жоба агроөнеркәсіптік салада, 1 жоба көлік логистикасы саласында, қалғандары сауда және білім беру саласына қатысты. Ірі жобалардың қатарында Қорқыт ата әуежайының жаңа терминалы да бар.
2025 жылы Қызылорда облысында мыңға жуық жұмыс орнын құрып, 30,8 млрд теңге өнім шығаруға мүмкіндік беретін 275,3 млрд теңгені құрайтын 24 жобаны іске қосу жоспарланып отыр. Ірі зауыттардың қатарында жылына 90 млн дана кірпіш шығаратын, түйе сүтінен жылына 392 тонна ұнтақ өндіретін, жолаушылар вагондарын жөндейтін жобалар бар. Қуаты 240 МВт болатын жаңа ЖЭО құрылысы да – осы қатарда.
«Алдағы уақытта жалпы қуаты 141 МВт болатын 4 күн және 1 жел электр стансасының құрылысын жүзеге асыруды жоспарлап отырмыз. Облыстың электр энергиясына деген сұранысы тәулігіне 200 МВт-ты құрайды, өңірде жалпы қуаты 89 МВт болатын 9 күн электр стансасы жұмыс істейді. 5 жоба іске қосылғанда өңіріміз толығымен жасыл энергетикаға көшеді», деп атап өтті облыс әкімінің орынбасары Ардақ Зебешев.
Сыртқы істер министрлігі Инвестициялар комитеті қатысушыларға Ұлттық цифрлық инвестициялық платформаны яғни инвесторлардың, мемлекеттік органдардың және квазимемлекеттік сектордың өзара іс-қимылы үшін бірыңғай терезе мүмкіндіктерін таныстырды. Бүгінде платформа пулында 836 жоба бар, оның 246-сын осы жылы жүзеге асыру жоспарланған.
Кеңесте облыстағы екі ірі инвестициялық жобаны жүзеге асыруға қатысты түйткілді мәселелер талқыланды. Бұл – «Шалқия» полиметалл кен орнының тиімділігін арттыру және кальцийлендірілген сода өндіретін зауыт салу. Атап айтқанда, тағамдық және өнеркәсіптік ас тұзын, полипропиленді қапшықтар шығаратын «Аралтұз» АҚ қазір еліміздегі кальцийленген сода шығаратын алғашқы зауыт құрылысының жобасын қолға алған. Шыны бөтелкелерді өндіруге қажетті бұл шикізат компоненті елімізде толығымен импортталады. Жоба айтарлықтай инвестицияларды қажет етеді, несиелік қаржыландыру мерзімдері мен шарттарын ұзарту бойынша мәселелер бар. Вице-премьер тиісті қаржы институттарына жобаны қолдау үшін барлық мүмкіндікті қарастыруды тапсырды.
«Мемлекеттік органдар инвестициялық жобаларды жүзеге асырудағы кедергілерді жоюда бизнеске барынша көмек көрсетуі керек. 2025 жылға арналған 246 жобаның мақсаты – жақсы көрсеткіш, оған жету үшін мүмкіндігінше барлық кедергіні жойып, уақтылы қаржыландыруды қамтамасыз ету керек. Ол үшін қысқа мерзім ішінде Инвестициялар комитеті Өнеркәсіп министрлігімен және әкімдіктермен бірге басым сала әрі жоғары қосылған құн қағидаты бойынша жобаларды градациялауды жүргізуі қажет. Сонымен қатар нәтижелерге сүйене отырып, оларды жүзеге асыруға қолдау білдіруі керек», деп қорытындылады жиынды Серік Жұманғарин.
