Сурет: aimak.com.kz
Мәселен, кәсіпкер Вячеслав Орловтың айтуынша, иелігіндегі жер телімінің үстінен бөгет салынған. Қазір оның иелігіндегі жер екіге бөлініп тұр. Ол 2022 жылдың қазан айында Махамбет ауданындағы Бейбарыс ауылынан 2,7 гектар жер телімін жеке иелігіне алған екен. Мақсаты – құс фабрикасын ашу. Жаңа нысанның құрылысын жүргізу мақсатында былтыр жыл басында жер телімін қоршауды бастаған. Жер теліміне трансформаторлық қосалқы станса орнатқан.
Махамбет ауданында су тасқынынан қорғану үшін ұзындығы 105 километр бөгет соғылған. Ал кәсіпкердің иелігіндегі жер телімі арқылы салынған бөгеттің ұзындығы – 225, табаны – 12, биіктігі – 2,5 метр.
«Маған жер теліміне бөгет салу туралы ешкім хабарлаған жоқ. Мен бөгет салуға рұқсатымды берген жоқпын. Бөгетке қолданылған топырақ үйіндісінен жер телімін қоршауға қағылған 38 бетон бағанасы бүлінді. Қазір иелігімдегі жер телімі екіге бөлінгендіктен, бизнес жоспарымды бастай алмай отырмын», дейді В.Орлов.
Кәсіпкердің айтуына қарағанда, осы мәселені оң шешу үшін бірнеше әкімдікке жүгінгенімен, мәселе әлі толық шешімін таппай отыр. Нақтылай айтқанда, Бейбарыс ауылдық округінің, Махамбет аудандық, Атырау қалалық әкімдігіне хат жазған.
«Әкімдіктерден тұщымды жауап алмадым. Олар тек хатымды бір-біріне жолдап отыр. Амалым таусылған соң Атырау облысының кәсіпкерлер палатасына жүгіндім», деп мәлімдеді В.Орлов.
Махамбет аудандық жер қатынастары бөлімінің басшысы Ақылбек Сәлиевтің мәліметіне сүйенсек, су тасқыны салдарынан зардап шеккен кәсіпкерлердің тізімі жасақталған. Шағым білдірген кәсіпкердің жер телімі арқылы салынған бөгет Атырау қалалық әкімдігі тапсырысымен жүргізілген.
«Біздің ауданнан су тасқыны кезінде шамамен 105 кәсіпкерлік субъектісі зардап шекті. Қазір оларға өтемақы төлеу жұмысы жүргізіліп жатыр. Зардап шеккен кәсіпкерлердің тізімінде Вячеслав Орлов жоқ. Өйткені біздің балансқа оның жер телімі арқылы өтетін бөгет алынбаған», дейді А.Сәлиев.
Кәсіпкерлер құқықтарын қорғау жөніндегі уәкілдің Атырау облысы бойынша сектор меңгерушісі, облыстық кәсіпкерлер палатасы директорының орынбасары Сәрсенбай Жолдыбаевтың пікірінше, істе кәсіпкердің құқығын бұзу дерегі бар. Түйткілді оң шешудің жолы қандай?
«Қолданыстағы заңнамаға сәйкес түйткілді мәселені шешудің екі тетігі бар. Біріншісі – кәсіпкерге өтемақы төлеу, екіншісі – аумағы мен құны жағынан ұқсас басқа жер телімін беру. Осыған байланысты тиісті органдарға ұсыныстар жіберілді. Егер олардың жауабы мен мәселені шешу тұрғысындағы ұсынысы кәсіпкерді қанағаттандырмаса, оның мүддесін сотта қорғауға дайынбыз», деді С.Жолдыбаев.
Атырау облысы
