Шаңғышыларымыз би-атлоннан спринттік сайыста олжа салды. Ерлер додасында 10 шақырымдық қашықтықты 23 минут 14 секундта өндірген жерлесіміз Никита Акимов дүбірлі доданың чемпионы атанды. 49 спортшының арасынан қара үзіп шыққан саңлақ нысананы көздей атудың екі кезеңінде де барлық мүмкіндігін мүлт жібермей дөп тигізді.
Алтын медаль – Никитаның айтулы аламандағы сүбелі табысы. Еліміздің биатлоннан ересектер құрамасына өткеніне көп бола қоймаған сайыпқыран қатысушылар арасында тегеурінді бәсекелестері көп болғанын айтты. «Біз, отандасым Полина Егорова екеуіміз спринттік сайыстың алдында микс-эстафета додасында (ерлер 7,5 шақырым, әйелдер 6 шақырым) 4-орынды місе тұттық. Қола жүлде олжалауға мүмкіндік туып, тартысқа түскенде күшімізді сарқып алдық. Медаль бұйырмағаны еңсемді түсіріп-ақ жіберіп еді. Бүгінгі 10 шақырымдық сайыстың екінші айналымына келгенде тағы да жүлдесіз қалам ба деген қобалжу болды. Бірақ барымды салып, нысананы көздеп атуда да қателеспей дөп тигіздім. Жаһандық доданың алтын медалін елімізге тарту еткеніме қуаныштымын», деді Н.Акимов.
Қысқы Универсиаданың кезекті медалін қанжығамызға биатлонның спринт сайысынан Арина Крюкова байлады. 7,5 шақырымды ол 23 минут 17 секундта өндірді. Жерлесіміз нысана көздеудің бірінші сыны, жер бауырлап жатып нысананы көздеуде барлық мүмкіндігін дөп тигізсе, екінші тік тұрып кезенуде екі мүмкіндігін мүлт жіберіп алды. Дегенмен де уақытты ұтымды пайдалана отырып, жылдамдығын үдетіп, қола жүлдегер атанды. Арина да спорттық мансабындағы алғашқы медалін олжалады.
Дүниежүзілік қысқы Универсиада ойындарында парашаңғыдан Денис Зинов 1 400 метрге спринттік сайыста күміс медаль еншіледі. Ол бұған дейін 10 шақырымға еркін стильде тартысқа түсіп те күміс жүлде алған еді. Қазақ спорт және туризм академиясының студенті келешекте Паралимпиаданың чемпионы атануға барын салатынын жеткізді. «Қысқы Универсиаданың бағдарламасына парашаңғы сайысы алғаш рет қосылды. Соған қарамастан бәсекелестік өте жоғары. Бапкерлердің еңбегі ақталды, дегенмен өкінішім де жоқ емес, екі медалімнің бірі алтын болғанда, шіркін... Келешекте Паралимпиада сайысында жеңіске жетуге барымды саламын. Туриндегі тартыс бізге өте ауыр соқты. Себебі таулы өңірге табанымыз тигеннен климатқа үйренісу оңай болмады. Соған қарамастан барымызды салдық», деді спортшы. Колледжде оқып жүргенде аяғына шаңғы ілген спортшы 7 жылда осындай биікке қол жеткізіп отыр.
Парашаңғыдан 1 400 метр қашықтықта (спринт) Қостанай колледжінің студенті Роман Құрбанов қола жүлде еншіледі.
