Аудан орталығындағы үш қабатты ауруханада терапия, жұқпалы аурулар, балалар, хирургия бөлімдері тәулік бойы жұмыс істеп тұр. Стационарында жылына 2000-ға таяу науқас емделеді. Бірқатар операцияны жедел жасауға да мүмкіндік бар. Мәселен, соқырішек, асқазанның тесілген ойық жарасы, жатырдан тыс жүктілік сынды операцияны ауруханада жасай береді. Жедел жәрдем бөлімі қызметкерлері 4-санаттағы шақыртуларға, өздері хабарласқан науқастарға тәулік бойы, демалыс, мереке күндері медициналық қызмет көрсетеді.
Аудандық аурухананың бас дәрігері Гүлмира Сәкенова мәлім еткендей, ауыл халқына көрсетілетін медициналық қызметтерінің сапасын арттыру мақсатында Қабырға, Жаңаүлгі, Қайыңды, Өрнек, Ақмарал, Қызыл Жұлдыз ауылдарының медициналық пункттеріне күрделі жөндеу жүргізілді. Сонымен қатар «Ауылдағы денсаулық сақтауды жаңғырту» қанатқақты ұлттық жобасы аясында Барлық ауылында заманауи стандарттарға сай жаңа медициналық пункттің құрылысы жүріп жатыр. Еңбек, Аршаты, Жазаба ауылдарындағы медпункттерге де күрделі жөндеу қажет. Реті келсе, қайта салған дұрыс деп есептейді бас дәрігер.
– Мүмкіндігімізге қарай алыс ауылдардағы тұрғындарға да көмек көрсетіп келеміз. Катонқарағай аймағында тіркелген халық саны 9 104 адамды құрайды, мекеменің қызмет көрсету радиусы – 120 шақырым. Тұрғындар тарапынан ешқандай арыз-шағым жоқ, – дейді Г.Сәкенова.
Аудандағы медициналық көмек көрсетуге арналған емдеу, алдын алу мекемелеріне ортақ, тәулік бойы жұмыс істейтін 40 төсекке, күндізгі стационарлық 30 төсекке арналған аурухана бар. Сонымен қатар Ақсу, Өрел, Аққайнар ауылдарында дәрігерлік амбулатория жұмыс істеп тұр. Басқа да ауылдарда 17 медициналық пункт бар. 3 дәрігерлік амбулатория санитарлық автокөліктермен қамтамасыз етілген. Алайда автокөліктің бірқатары ұзақ жыл бойы қолданыста болғандықтан, техникалық жағдайын қалыпты ұстап отыруда үлкен қаржылық шығындар бар екенін алға тартады бас дәрігер.
Мекемедегі 23 дәрігердің төртеуі жоғары санатты. Қосымша хирург, рентгенолог, окулист, акушер-гинеколог, инфекционист сынды мамандар қажет. Бас дәрігердің айтуынша, рентгенолог қашықтан жұмыс істеуге мәжбүр болып отырса, акушер-гинеколог дәрігері зейнет демалысында.
– Маман тапшылығы бар. Мәселені шешу, ауылдық елді мекендерге жас мамандарды жұмысқа тарту үшін аурухана жанынан екі пәтерлі тұрғын үй, бір реттік қаржылай көмек беріледі. «Дипломмен ауылға» келеміз деген мамандарға есігіміз ашық, – дейді бас дәрігер.
Аурухана қажетті медициналық жабдықтармен қамтамасыз етілген. Өткен жылы облыс бюджеті есебінен бөлінген 29 млн 422 983 теңгеге жаңадан 6 дана медициналық аппарат, атап айтқанда, 12 арналы электрокардиограф, қан қысымын бақылау жүйесі, холтер, аудио-смарт, спирометр, фетальды монитор сатып алынды. Сонымен қатар сүт безі обырының қатерлі ісігін ерте анықтауға бағытталған шараларды жүзеге асыратын автоматты рентгенмаммографиялық аппараты мен оған қажетті цифрлық жүйе орнатылған. Биылғы жылы да қажетті медициналық құрал-жабдықтармен, қондырғылармен қамтамасыз етуді жалғастыру көзделіп отыр.
Ауруханада консультативтік диагностикалық қызметтер де жолға қойылған. Мұнда невропатолог, эндокринолог, стоматолог, профпатолог, хирург, онколог, психиатр-нарколог, инфекционист, дерматовенеролог мамандар қызмет көрсетеді. Мамандар айына 3 мыңнан астам қабылдау жүргізеді.
Аурухана базасындағы зертханада гематологиялық, биохимиялық, микробиологиялық, иммунологиялық, жалпы клиникалық зерттеулер жүргізіледі. Қан, оның компоненттерін құю кабинеті де жұмыс істеп тұр. Мұнда жылына 15-тен артық адамға қан, 250 ден астам адамға қан алмастырғыштар құйылады. Ауруханада оңалту қызметтері де бар. Арнайы білімді медицина қызметкерлері массаж ғана емес, емдік-физикалық жаттығу терапиясын да өткізеді. Бірақ арнайы тренажерлар, спорттық құрал-жабдықтар, психо-физикалық күйді жақсартатын кабинеттер қарастырылмаған.
Ең негізгі мәселенің бірі – түкпірдегі ауылдарда интернеттің жоқтығы немесе әлсіздігі. Соның салдарынан халыққа көрсетілген медициналық деректерді толтыру үшін қызметкерлер аптасына үш рет Катонқарағай ауылына келіп-кетуге мәжбүр. Қорыта айтқанда, ауданда халықтың денсаулығын сақтау бағытындағы жүйелі жұмыстар тынымсыз атқарылып жатыр.
Шығыс Қазақстан облысы,
Катонқарағай ауданы
