Фото: elordainfo.kz / Бақтыгүл Бурбаева
Еңбек және халықты әлеуметтік қорғау министрлігінің мәліметінше, былтыр мемлекеттік әлеуметтік жәрдемақы (МӘЖ) мүгедектігі бойынша 552,3 мың адамға, асыраушысынан айырылу жағдайы бойынша 193,9 мың адамға берілген.
Мүгедектігі бойынша мемлекеттік әлеуметтік жәрдемақылардың мөлшері мүгедектіктің тобына, себебіне қарай белгіленеді. Сондай-ақ тиісті қаржы «Республикалық бюджет туралы» заңда белгіленген ең төмен күнкөріс деңгейінің мөлшеріне байланысты есептеледі.
Асыраушысынан айырылу жағдайы бойынша мемлекеттік әлеуметтік жәрдемақылардың мөлшері қайтыс болған асыраушысы ажалының себебіне, қамқорлығындағы адамдардың санына, әрі ең төмен күнкөріс деңгейіне байланысты болады.
Бұдан бөлек, міндетті әлеуметтік сақтандыру жүйесіне қатысушыларға әлеуметтік тәуекелдер туындаған жағдайда мемлекеттік әлеуметтік сақтандыру қорынан төлемдер аударылады. 2024 жылы 102,3 мың адам еңбек ету қабілетінен айырылғандықтан әлеуметтік төлем алса, 67,9 мыңға жуық отбасына асыраушысынан айырылуына байланысты әлеуметтік төлем берілген.
2025 жылғы 1 қаңтардан бастап мүгедектігі бойынша, асыраушысынан айырылу жағдайы бойынша мемлекеттік әлеуметтік жәрдемақылардың мөлшері ең төмен күнкөріс деңгейінің ұлғаюына байланысты 6,5%-ға өсті. Үкіметтің шешімімен еңбекке қабілеттілігінен, асыраушысынан айырылу бойынша МӘСҚ-дан төленетін төлемдердің мөлшері де 6,5%-ға артты. Осылайша, мүгедектігі бойынша МӘЖ мөлшері І топ үшін – 101 702 теңге, ІІ топ үшін – 81 362 теңге, ІІІ топ үшін 55 474 теңгеге жетті.
Биылғы 1 қаңтардағы жағдай бойынша еңбекке қабілеттілігінен айырылу бойынша әлеуметтік төлемдердің орташа мөлшері 60 407 теңге, асыраушысынан айырылу бойынша 64 772 теңге болды.
