Құрылыс жергілікті тұрғындарға қосымша жұмыс орындары ашпақ. Сонымен қатар 2024 жылы ірі түйіндік хабтарды дамыту мақсатында әуе көлігі инфрақұрылымын жаңғырту аясында бірқатар жұмыс атқарылды. Мысалы, үш жаңа жолаушылар терминалы пайдалануға берілді. Алматы, Шымкент, Қызылорда қалаларында жолаушылар терминалының өткізу мүмкіндігі артты.
Алматы қаласы Халықаралық әуежайы жаңа терминалының өткізу мүмкіндігі жылына 2,5 млн-нан 14 млн жолаушыға дейін ұлғайды.
Отандық авиакомпаниялар «Air Astana», «SCAT», «Qazaq Air», «FlyArystan» Қазақстанның 19 қаласына тұрақты ұшып тұрады. Халықаралық әуе қатынасын әлемнің 26 елінде 50 бағытта 30 шетелдік авиакомпания орындайды.
Шымкент қаласы әуежайының жаңа терминалының өткізу мүмкіндігі – жылына 800 мыңнан 6 млн жолаушыға дейін. Жаңа терминал халықаралық әуе бағыттарының санын 10-ға, рейстерді аптасына 24-ке дейін арттырды. Джидда, Медина (КСА), Доха (Қатар), Фукуок (Вьетнам) және Пхукетке (Таиланд) әуе қатынасы ашылды.
Қызылорда қаласының «Қорқыт Ата» халықаралық әуежайының өткізу мүмкіндігі жылына 300 мыңнан 2 млн жолаушыға дейін өсті. Бүгінде Қызылорда қаласынан 25 ішкі рейс орындалып жатыр.
«Skyhansa» қазақстандық-германдық компаниясымен «Қорғас-Шығыс қақпасы» арнайы экономикалық аймағында көптеген жоба басталды. Мысалы, қуаты сағатына 500 адамға дейінгі жолаушылар терминалын, сыйымдылығы 550 мың тоннаға дейінгі отын қоймасын, жүктерді 250 мың тоннаға дейін толық өңдейтін жүк терминалын салынады. Сондай-ақ әуе кемелеріне қызмет көрсететін авиациялық-техникалық орталық құрылмақ. 300-ден аса тұрақты жұмыс орнын құра отырып, туристік және сауда, ойын-сауық қызметтерін дамыту жоспарланған.
Кейінгі жылдары әуе көлігі жолаушыларға ыңғайлы әрі тартымды болуға тырысып жатыр. Жылдан-жылға әуе тасымалы 10-15%-ға арта түскен. 2024 жылы отандық авиакомпаниялар 15 млн-ға жуық адамды тасымалдады, әуежайлар 30 миллион жолаушыға, оның ішінде шетелдік авиакомпаниялар мен азаматтарға қызмет көрсетті. 2024 жылы жүк тасымалы көлемі жылына 28 мың тоннаға ұлғайды.
Отандық әуе тасымалдау жүйесін дамытудағы маңызды элементі – ұшақтар паркін жаңарту. Ол жыл сайын 10-15 әуе кемесімен толықтырылады. Бүгінде еліміздің авиапаркі 102 ұшақты құрайды.
Қазақстаннан халықаралық әуе қатынасы 31 елмен (Ресей, Қырғызстан, Өзбекстан, Тәжікстан, Грузия, Беларусь, Әзербайжан, БАӘ, Сауд Арабиясы, Қатар, Иран, Оман, Мысыр, Кувейт, Оңтүстік Корея, Қытай, Үндістан, Вьетнам, Таиланд, Моңғолия, Камбоджа, Малайзия, Мальдив аралдары, Шри-Ланка, Түркия, Ұлыбритания, Германия, Италия, Нидерланд, Польша, Чехия) аптасына 582 рейс жиілігімен 117 бағытта орнатылды.
Сонымен қатар ерекше қажеттіліктері бар азаматтар үшін барлық қажетті жағдай жасалған. Жерүсті қызметінің мамандары алғашқы медициналық көмек көрсету, оның ішінде ерекше қажеттіліктері бар азаматтарды сүйемелдеу бойынша тұрақты арнайы оқудан өтеді. Амбулаторлық көтергіштер, арнайы арбалар, көзі нашар көретіндерге арналған арнайы жолақшалар мен дыбыстық навигация жүйелері бар.
Еліміздің халықаралық әуежайларында ана мен балаға арналған бөлмелер, валюта айырбастау пункттері, пошта байланысы, сымсыз интернет бар. Сондай-ақ онлайн тіркеу үдерісін жылдамдату үшін бірқатар әуе компаниялары мобильді қосымшаларды енгізді. Көрсетілетін қызметтер барлық санаттағы азаматтар үшін сапаны және қолжетімділікті арттыруға бағытталған.
Жолаушылар әуе тасымалдары көрсеткішінің өсуі, маршруттардың артуы ішкі және шетелдік туризмді дамытады. Бұл ел өңірлерінің инвестициялық тартымдылығын арттырады.
Қазақстандағы авиация саласының дамуы, халықаралық танылымы ұшу қауіпсіздігіне байланысты. Елімізде ұшу қауіпсіздігі халықаралық стандарттарына сәйкестік деңгейі 82%-ды құрайды. Бұл – ТМД елдері арасында ең жоғары көрсеткіш. Дания мен Польша сияқты Еуропа одағы елдерімен салыстыруға келеді.
