Атыраудағы цехта төрт түрлі шұжық дайындалады

АТЫРАУ. 5 ақпан. Атырау қалалық әкімдігіне қарасты Ақжар елді мекенінде күніне 1 тонна 200 кило шұжық өнімдерін шығаратын жаңа цех ашылды. Бұл туралы egemen.kz тілшісі хабарлады. Шұжық өнімдерін дайындайтын цехты Исатай Батырбаев құрылтайшылық ететін «Жеміс» серіктестігі іске қосты. Цехқа Франциядан шығарылған технологиялар орнатылды. Сондай озық технологияның бірі –«Саріс» пешінде 40 минутта 350 кило шұжық фаршын дайындау мүмкіндігі бар. Цех басшысы Лұқпан Абылаевтың айтуынша, шұжықтар таза әрі сапалы, мерзімінен бұрын бұзылуға жол бермейтін қаптамамен қапталады. Ал дәмдеуіштер Алматыдан жеткізіледі. Шұжыққа қажетті ет Аққыстау селосынан тасымалданады. «Біздің цехымызда күніне 1 тонна 200 килоға шұжық дайындауға толық мүмкіндік бар. Жоғары сапамен дайындалған өз өнімдерімізді ашық сөрелерде саудалауға қарсымыз. Тек «Атаба», «Идеал» секілді сауда орталықтары арқылы тұтынушыға ұсынуды жөн көрдік», дейді цех басшысы Лұқпан Абылаев. Жергілікті өнім өндірушілерге грузиялық Сулхан Чихадзе дәмді шұжық дайындау құпиясы жөнінде кеңес береді. Әзірге цехта төрт түрлі шұжық дайындалады. Жолдасбек Шөпеғұл. Дерек: egemen.kz. Сурет: Рахым Қойлыбаев.