Нақты деректерге құрылған туынды жөнінде автордың өзі: «Бұл кітапта КСРО Бас штабы Бас барлау басқармасының 177-арнайы мақсаттағы жеке жасағының құрылуы мен күнделікті өмірі туралы жазылған. 1980 жылдың қаңтарында Алматы облысы, Қапшағай қаласында құрылған, аты аңызға айналған Қара майор – Борис Керімбаев басқарған атақты «мұсылман батальоны» 1981 жылғы қазан айынан 1989 жылдың ақпанына дейін Совет армиясының Ауғанстандағы шектелген контингенті құрамында болды. Өз іс-әрекеттерімен жасақ өшпес жауынгерлік даңққа бөленіп, арнайы мақсаттағы әскерлер арасында ең белгілі бөлімдердің біріне айналды. Жасақтың алғашқы құрамы 1983 жылғы қазан айына дейін соғысты, аталған жасақ туралы, олардың сол кезеңдегі жауынгерлік істері туралы жаздым», деп толғанады.
От пен оқтың ортасында жүріп, оны айна-қатесіз қағазға түсіріп, оқырманға ұсыну оңай жұмыс емес. Бұл жерде барынша байыптылық, шығармашылық шеберлік қажет. Осы ретте бұл тақырыпты терең зерттеп жүрген Айгүл Ермекова бұл еңбектің Ауған соғысы туралы құнды кітаптардың бірі екенін айтады.
«Ауған соғысы жайында оқығаным да, тыңдағаным да жетерлік, тіпті атақ-даңқы күллі елге мәлім «Қара майор» атанған Борис Керімбаевтың өзімен де бірнеше мәрте кездесіп, әңгімелестім. Жаны жайсаң, кең құлашты, терең ойлы азамат еді. Ардагер туралы аңызға бергісіз ауызша әңгімелерді көп естідім, солардың ішінде өлеңдер де болды. 2017 жылы «Ауған соғысындағы атыраулық жауынгерлер шежіресі» атты кітабымның жарыққа шығуына дем берген Борис Төкенұлы мен Амангелді Теміржанұлы еді. Атыраудан соғысқа қатысқан 868 жауынгерден 546 жауынгердің өмір дерегі кітапқа енді. Ал А.Жантасовтың «Жартасты жастанған жасақ» кітабын оқып, қатты риза болдым. Кітап бастан-аяқ нақты дерекке негізделген құнды еңбек», дейді зерттеуші.
Қорыта айтқанда, бұл кітап – үлкен еңбектің жемісі, жауынгерлердің асыл рухына тағзым әрі ескерткіш.
