Турин төрінде ән-ұранымызды шырқатып, байрағымызды желбіреткен саңлақтардың жеңісі мақтауға лайық. Жасөспірімдер арасында әлем чемпионы атағына ие Анастасия Городко ересектер сапындағы алғашқы додасында да топ жарып, мерейімізді асырды. Фристайл-могулдан жекелей сында өзінің шеберлігімен тәнті еткен саңлақ паралелль-могулда да қара үзіп, Қысқы Универсиада ойындарынан екі алтын медаль олжалады. Шығыс Қазақстан облыстық спорт мектебінің түлегі, Қазақ туризм және спорт академиясының 3-курс студенті А.Городко болашағынан мол үміт күттіреді. Бұған дейін жасөспірімдер арасында дараланған саңлақ әлем назарына ілікті. Келесі жылы Италия елі қысқы Олимпия ойындарын өткізеді. Міне, осы додаға үкілеп қосатын үздігіміздің бірі – Анастасия Городко.
Үшінші алтын медальды еншімізге бөктерген Никита Акимов та – Шығыс Қазақстан облысындағы жоғары спорт шеберлігі мектебінің түлегі. Биатлоннан 10 шақырымдық сайыста алдына қара түсірмеген «Мирас» университеті студентінің келешегінен де кемел үміт күтеміз.
Қысқы Универсиада ойындарында күміс медальмен күптелген спортшыларымыздың да жетістігі айтарлықтай. Фристайл-могулдан жекелей сында 4-орынға тұрақтаған Аяулым Әміренова паралелль-могулда күміс медаль иеленді. Әл-Фараби атындағы Қазақ ұлттық университетінің докторанты Аяулым Туриннен олжасыз қайтпады. Аяулым 2018 жылы Оңтүстік Кореяның Пхёнчхан қаласында, 2022 жылы Қытай астанасы Бейжіңде өткен қысқы Олимпия ойындарына қатысты. 2017 жылы Еуропа кубогінің кезеңдеріне жүлде еншіледі. Фристайл-могулдан ерлер арасындағы сында күміс медаль еншілеген Антон Бондарев – С.Аманжолов атындағы Шығыс Қазақстан университетінің студенті. Шаңғы жарысынан екі қашықтықта да күміс медаль олжалаған парашаңғышы Денис Зиновтың еңбегі ерен. Ол – ел спортының ұстаханасы саналатын Қазақ спорт және туризм академиясының студенті.
Бұл оқу ордасының өзге студенттері де Турин төрінде толайым табысқа қол жеткізді. Қысқы Универсиада ойындарының қола медалін парашаңғыдан Роман Құрбанов екі қашықтықта еншілесе, мәнерлеп сырғанаудан Софья Самоделкина, биатлоннан Арина Крюкова, Кирилл Бауэр қола жүлдегер атанды. Төртеуі де Қазақ спорт және туризм академиясының студенттері.
Шорт-тректен аралас эстафета сайысында ел қоржынына қола жүлдені Батыс Қазақстан инновациялық-технологиялық университетінің студенті Алина Әжіғалиева, Валерий Клименко, Дінмұхамедалдияр Тәжібай, М.Х.Дулати атындағы Тараз университетінің студенті Малика Ермек салды. Екі жыл бұрын АҚШ-та өткен қысқы Универсиада ойындарында аралас эстафетадан қыз-жігіттер күміс медаль еншілеген болатын. Туринде сол биігіне жете алмады. Ерлер құрамасы сапында Дінмұхамедалдияр Тәжібай, Валерий Клименко, Айбек Темірхан, Санжар Жанысов, Әлішер Абдулқатымов сынға түсіп, қола медаль иеленді.
ХХХІІ дүниежүзілік Қысқы Универсиада ойындарында 96 медаль жиынтығы бәйгеге тігілді. 57 елден келген 2000-нан астам студент-спортшы 10 күн бойы додаға түсті.
Біздің спортшылар дүниежүзілік қысқы Универсиада ойындарына 1993 жылдан бері тұрақты қатысып келеді. Сол жылы Польшаның Закопане қаласында өткен аламанда еліміз спортшылары 1 күміс медальді місе тұтты. 1995 жылы Испанияның Хака қаласы қабылдаған қысқы Универсиада ойындарынан 2 алтын, 1 қола медальмен оралды. 1997 жылы Оңтүстік Корея, 1999 жылы Словакия, 2001 жылы Польша елінде өткен ойындардан спортшыларымыз жүлдесіз қайтты. 2003 жылы Италияда өткен жарыстан 2 алтын, 1 күміс, 1 қола, 2005 жылы Аустрия елі өткізген додадан 4 алтын, 1 күміс, 2 қола медаль олжалады. 2007 жылы Италияның Турин қаласы қабылдаған қысқы Универсиадада 2 алтын, 1 күміс, 2 қола жүлде бұйырды. 2009 жылы Қытайдың Харбин қаласында студент спортшыларымыз медаль алмаса, 2011 жылы Түркияда 1 алтын, 5 қола медаль еншілейді. 2013 жылы Италияның Трентино қаласын дүбірге бөлеген ақ аламанда 2 алтын, 2 күміс, 1 қола медаль бұйырды. 2015 жылы дүниежүзілік Қысқы Универсиада ойындарын Испания мен Чехия тізе қосып өткізді де, біздің елден барған спортшылар 5 алтын, 6 күміс медаль еншіледі. 2017 жылы еліміз тұңғыш рет қысқы Универсиада ойындарын өткізді. Алматы қаласындағы додада спортшыларымыз 11 алтын, 8 күміс, 17 қола медаль иеленіп, тарихи нәтиже тіркеді. Одан кейін 2019 жылы Ресейде өткен сайыста 4 күміс, 3 қола бұйырды. 2023 жылы АҚШ ұйымдастырған додада 3 алтын, 4 күміс, 4 қола медаль иеленді.
