Құрметке лайық азамат

Павлодар облысы Шарбақты ауданында 1990 жылдары 37 мектептің 3-і қазақ тілінде болды. Өзге ұлт өкілдері көп тұрды. Қазақ тілінде білім алатын оқушылардың саны 2000 жылдары 62 пайызға жетті. Осы бір игілікті істі жүзеге асыруға, ата-аналармен кездесіп, балаларын қазақ мектептеріне беруге Қаһарман Зағыт бастаған Халықаралық «Қазақ тілі» қоғамының аудандық филиалы үлкен үлес қосты. 1993 жылы жерлесіміз, абыз ақын Мұзафар Әлімбаевтың 70 жылдық мерейтойын атап өтуде де Қ.Зағыт белсенділік танытты. Тіл бөлімі арқылы арнайы курстардан өтіп, білімін жетілдірген жастар бүгінде білікті мамандардың қатарына қосылды. Қазақ тілін әжептәуір меңгеріп алған басқа ұлттың өкілдері де бар. Қ.Зағыт жер су, ауыл, көше атауларының байырғы аттарын қайтаруда да үлкен жұмыс атқарды. Көші-қон, оралмандарды орналастыру мәселесімен де шұғылданды. Тіл мен онамастика мәселесі ол кісінің жұмысының басты тақырыбы болды. Аудандық кәсіпкерлер одағының төрағасы Темірболат Қарашаштың айтуынша, Қ.Зағыт 46 жылдық еңбек жолының 25 жылын мемлекеттік қызметке арнапты. Қ.Зағыт 1971 жылы Алматы мал дәрігерлік институтын бітірген соң облысқа жолдамамен келді. Еңбек жолын Маралды кеңшарында мал дәрігері болып бастайды. Қаһарман Қаматайұлына амандық тілейміз. Фарида Бықай. Сурет: egemen.kz.