Египетте Путин жайлы кітап жарыққа шықты

АСТАНА. 5 ақпан. Египетте Ресей президенті Владимир Путин туралы кітап жарыққа шықты. Бұл туралы «Аргументы и факты» хабарлады. «Египет журналисі Сами Амара Ресей президенті Владимир Путин туралы кітап шығарды», - делінген хабарда. «Путин... капитал мен биліктің күресі» деп аталатын кітаптың Каирдегі тұсаукесері 46-шы халықаралық кітап көрмесінің шеңберінде өтті. Кітап авторы Амара 80-ші жылдардың аяғынан бастап Египеттің «Әл-Ахрам» атты орталық газетінің Мәскеудегі меншікті тілшісі болған. Оның айтуынша, «Владимир туралы арабтар жазған бірінші кітап» болып отыр. РФ президенті Владимир Путин алдағы 9-10 ақпан күндері Каирге жұмыс сапарымен келіп, Ресей-Египет қарым-қатынасын дамытудың перспективасын талққылауға қатысады. Кремльдің баспасөз қызметі хабарлағандай, кездесу барысында Таяу Шығыс аймағы мен Солтүстік Африкада, бәрінен бұрын Иракта, Сирияда, Ливияда қалыптасып отырған жағдай, сондай-ақ Палестина-Израиль қарым-қатынасын ретке келтіру мәселелері туралы пікір алмасылады. Мұрат Айтқожа. Дерек, фото: Аргументы и факты.