Сәтбаев қаласының әкімі Мұрат Бөрібаевтың бастамасымен қалада «Еңбекке – құрмет!» акциясы басталды. Акция түрлі форматта өткізіледі деп жоспарланып отыр. Бірақ ең бастысы, жұмыскерлерге, олардың қалтқысыз қызметтеріне деген шынайы сүйіспеншілікті қалыптастыруды көздейді.
Әкім бастамасын алғашқы болып қолдаған қалалық Жастар ресурстық орталығы көшелердегі қар тазалаушыларға ыстық ас, шай әзірлеп, жұмыс орындарына апарып берді. Жастарды қала әкімінің өзі бастап барды.
– Біз осындай болмашы ілтипатымыз арқылы өздеріңізге деген қалың бұқараның құрметін, ризашылығын жеткізгіміз келді. Сіздер уақытпен санаспай, қала тазалығы үшін тер төгіп жүрсіз-дер. Бұл қызметтеріңіз қандай да болсын мақтау, марапатқа лайық, – деген қала басшысы еңбек адамдарына қатысты түрлі деңгейдегі ынталандыру, ықылас шаралары үздіксіз көрсетіле беретінін жеткізді. Акция жыл бойына жалғасады.
Ұлытау облысы,
Сәтбаев қаласы
