Ардагерлер риза болды

Рымтай Шөкеев бастаған ардагерлер кеңесінің мүшелері облыс орталығында орналасқан «ҚазТрансОйл» АҚ Шығыс фи­лиалының өндірістік нысандарын аралап, мұнай тасымалдау­ жүйесімен танысуға өтініш біл­дірсе керек. Қазір өзгерістер заманы, басқа уақыт. Өз еліміздің игілігін өзіміз көрудеміз. Отандық мұнайдың аты – отандық мұнай. Ал, ардагерлерді бұл мұнай сонда қайда барады, қайдан келеді деген сұрақ мазалаған ғой. Алдымен ардагерлер тобы Павлодардағы мұнай құбыры басқармасына қарасты мұнай өндіру стансасына барады. Компанияның Шығыс бөлімшесінің орталық диспетчер­лік пунктіндегі кең экраннан Шымкент, Қарағанды, Петропавл, Үшарал, Жезқазған және Пав­ло­дардағы басқармаларына қарай­тын 4 мың шақырымнан астам мұнай құбырлары жүйесін көріп таңғалыпты. Ардагерлерді таңғалдырған екін­ші хабар, ол – Шығыс филиалында 3 мыңдай адам еңбек ете­тін­дігі. Былтыр 21 миллион тонна мұнай тасымалданыпты. Құны 23 млрд. теңге тұратын «Құмкөл-Қа­рақойын» бағытында магистраль­ді мұнай құбыры салыныпты. Бұл құбыр Қытайға тасымалданатын мұнай көлемін жылына 20 миллион тоннаға дейін жеткізе алады екен. Ардагерлерді таңғалдырған үшінші қуаныш – биыл компания­ның демеушілігімен облыс орта­лығында балабақша құрылысы басталмақшы көрінеді. Бұған қоса, филиалдың спорт және жаттығу залдарында Қабиболла Шәкәрім ағамыз басқаратын «Замандас» ардагерлер клубының ардагерлері келіп дене­шынықтырумен айналысады екен. Ардагерлер өздерін таң-тамаша қалдырған Шығыс филиалының жасап жатқан жұмыстары ұзағынан болсын, тіл тимесін деп сәттілік тілеп, алғыстарын білдірді. Фарида БЫҚАЙ, «Егемен Қазақстан». ПАВЛОДАР.