Ақтауда өртенген ұшақ

Бұрнағы күні Астана қаласынан кезекті рейсін жасап, Ақтау топырағына табан тіреген «SCAT» әуе компаниясының «Боинг» ұшағында өрт шықты. Астанадан кестеге сай ұшып, кес­теге сай Ақтау әуежайына қонған ұшақтан ешқандай техникалық ақаулар байқалмаған. Абырой бол­­­ғанда, салоннан өрт шыққан сәтте ұшақ бортындағы жолаушылар жерге түсіп болған екен. Деректер өрт аталмыш ұшақты кезекті «Минеральные воды» бағытында сапарға шығару үшін дайындап, техникалық қызмет көрсету жұмыстары жүргізіліп жатқанда тұтанғандығын айтады. Сонымен қатар, Ақтау халықаралық әуежайы өрт сөндірушілері дер кезінде сөндірген өрт ұшақ бортында оттегі баллоны жарылу себебінен пайда болды деген болжам айтылуда. – Жолаушылар ұшақтан кестеге сай түсірілген соң, онда техникалық қызмет көрсету жұмыстары бастал­ды. Осы кезде салонда өрт тұтан­ды. Авиакомпания оның себебін анық­тайтын болады, – дейді компанияның жұртшылықпен байланыс бөлімінің жетекшісі Виктория Ульянова. Қазіргі таңда оқиға орнында арнаулы авиациялық комитет жұмыс жа­сауда, сондай-ақ, «SCAT» әуе ком­паниясының ұшағының өртке орануы бойынша сотқа дейінгі тергеу жұмыстары басталған. Ғаламтор деректерінде Әуе көлігі халықаралық қауымдастығы (ИАТА) «SCAT» әуе компаниясының қызметін әлемдегі ең қауіпті әуе тасымалдаушылар ондығына енгізгендігі айтылуда. Соңғы үш жыл ішінде аталмыш мекеменің ұшақтарына қатысты сегіз оқиға тіркелген. Ақтау халықаралық әуежайында орын алған оқиға елдің үрейін ұшыр­­­ғанмен, ең бастысы, адамдардың аман­дығы деп ұшақтың жерге қонған соң өртеніп, бортындағы жолаушылардың дін аман қалғанына шүкіршілік етуде. Гүлайым ШЫНТЕМІРҚЫЗЫ, «Егемен Қазақстан». Маңғыстау облысы.