Кеше Қазақстан Республикасының Мемлекеттік хатшысы Гүлшара Әбдіқалықованың төрайымдық етуімен Қазақстан халқы Ассамблеясы жылын ұйымдастыру және өткізу жөніндегі мемлекеттік комиссияның кезекті отырысы болып өтті.
Онда Мәдениет және спорт министрі А.Мұхамедиұлы, Ақмола облысы әкімінің орынбасары Н.Нұркенов, Инвестициялар және даму вице-министрі С.Сәрсенов, Президент жанындағы «Қоғамдық келісім» республикалық мемлекеттік мекемесінің директоры Н.Калашникова баяндама жасады. Олар Ассамблея жылында атқарылып жатқан шаралар туралы біршама ақпарат берді.
Спикерлердің баяндамаларынан белгілі болғанындай, Қазақстан халқы Ассамблеясының жылында ауқымды шаралар атқарылып жатыр. Соның ішінде 470-тен астам әлеуметтік жоба қолға алынған, оларға барлық елді мекенде тұратын 8 миллионнан астам адам қатысыпты. Атап айтар болсақ, 2015 жылғы 6 ақпанда Астанада, облыс және аудан орталықтарында ҚХА жылының салтанатты түрде ашылуы кезінде 9 республикалық конкурстың басталуы жарияланып, ҚХА жылының жалауы көтерілген. Содан бері республика бойынша 2 800 елді мекенде 1 млн. 375 мыңнан астам адам қатысқан 4 120 іс-шара болып өткен.
28 ақпанда Елбасының Қазақстан халқы Ассамблеясын құру туралы Жарлыққа қол қойғанына 20 жыл толуына арналған «Менің Қазақстаным» атты Қазақстан халқының форумы өткізілген. Форум аясында «Бейбітшілік пен келісімнің жол картасы» мега-жобасының қорытындысы шығарылған. 5-11 сәуір аралығында Шымкент қаласында Қазақстанның этностық театрларының ІІІ республикалық фестивалі өткізіліп, отандық және қазіргі заман авторларының шығармаларынан қойылымдар көрсетілген.
21 наурызда Астана және Алматы қалаларында, облыстарда Наурыз мейрамына арналған «Бір ел – бір тағдыр» атты ҚХА фестивальдері өткізілген. ҚХА-ның ірі әлеуметтік акциялары мен жобалары да жүзеге асырылуда.
Ақпан-сәуір айларында «ҚХА – 20 ізгі іс» атты республикалық акция өткізілді. Акцияның символы – қасиетті Түркістан қаласынан жеткізілген, халықтың бірлігі мен берекесін бейнелейтін «Тайқазан» болды. «Тайқазан» өңірден өңірге «қайырымдылық істерге толтырылып», ҚХА-ның ХХІІ сессиясы қарсаңында Астанаға қайта оралды. «ҚХА – 20 ізгі іс» акциясы аясында 35 мың адамға көмек көрсетіліп, акция барысында әлеуметтік-мәдени маңызы бар объектілер салынып, іске қосылған және 1000 ағаш отырғызылыпты.
Сонымен қатар, «ҚХА – 20 ізгі іс» акциясы аясында ҚХА, этномәдени бірлестіктер мүшелері су тасқынынан зардап шеккен Қарағанды облысының тұрғындарына көмек көрсетті. Көмек қолын созуға ашылған пункттерге халық көп қайырылды. «Қарағанды облысының су тасқынынан зардап шеккен тұрғындарына көмек қоры» қоғамдық қорының арнайы шотына 12 млн. 400 мың теңге аударылды. 102 тонна гуманитарлық көмек – азық-түлік, дәрі-дәрмектер, тұрмыстық химия заттары, киім, жиһаз жөнелтілді, көмек көрсету әлі де жалғасуда.
Республикалық «ҚХА – 20 ізгі іс» акциясы 2015 жылдың соңына дейін жалғасады.
23 наурыздан бастап 22 сәуірге дейін 30 күн ішінде еліміздің 29 елді мекенін аралап шыққан «Менің Қазақстаным» пойызы» атты республикалық акция өткізілді. Ауқымды әлеуметтік акцияның мақсаты – Мемлекет басшысының Жолдауларының негізгі тарауларын халыққа түсіндіру, «Мәңгілік Ел» жалпыұлттық идеясын насихаттау, тұрғындарға медициналық, әлеуметтік, құқықтық қызмет көрсету, кәсіпкерлікті қолдау, ауыл шаруашылығын дамыту туралы кеңестер беру, мәдени және қоғамдық, т.б. іс-шаралар өткізу.
Министрліктер мен ведомстволардың мамандары 4,5 мыңнан аса әлеуметтік, медициналық, құқықтық және басқа кеңестер берді. Қоғамдық келісім кеңестерінің қоғамдық қабылдауларында Парламент депутаттары 320-дан аса адамды қабылдады. Көптеген мәселелер жергілікті жерлерде шешімін тапты. 9 мыңнан артық адамға республиканың жетекші мамандарымен медициналық көмектер көрсетілді. Жеке маршрутпен алыс бекеттер мен аялдамалардың 20 мың тұрғынына «денсаулық пойыздары» – «Саламатты Қазақстан», «Денсаулық» және «Жәрдем» пойыздары медициналық көмек көрсетті.
Елбасы Нұрсұлтан Әбішұлы Назарбаевтың қоғамдық келісім мен бірлік үлгісінің таныстырылымына алыс елді мекендердің 6 мың тұрғыны, «Менің елім – Мәңгілік Ел!» көрмесіне 5 мың 300 адам қатысты. 20 мыңнан артық жас қатысқан патриоттық акциялар, флеш-мобтар, КТК ойындары өткізілді.Пойыздың жүру жолында ҚХА-ның «Теңдессіз сыйлық» қайырымдылық акциясы аясында кітапханаларға мемлекеттік этносаясат бойынша ғылыми еңбектер тарту етілді.
Ассамблея жылының қорытындысы 2015 жылғы желтоқсан айында Қазақстан халқының форумында шығарылады. Мемлекеттік хатшының алдындағы кеңесте осы мәселелер айтылды.
Сондай-ақ, мәжіліс барысында Қазақстан халқы Ассамблеясы жылының аралық қорытындылары шығарылып, іс-шаралардың Ұлттық жоспарын одан әрі іске асыру және Ассамблея қызметін ақпараттық жағынан қолдау мәселелері талқыланды.
Отырыстың қорытындысы бойынша Мемлекеттік хатшы Қазақстан халқы Ассамблеясы жылының іс-шараларын «Баршаға ортақ қазіргі заманғы мемлекет» Ұлт жоспары – 100 нақты қадамдағы «Біртектілік және бірлік» төртінші институттық реформаның басымдығы аясында одан әрі іске асыру жөнінде бірқатар тапсырмалар берді.
Отырыс жұмысына Парламент депутаттары, мемлекеттік органдардың өкілдері, республикалық этномәдени бірлестіктердің жетекшілері, ҚХА ғылыми-сарапшылық кеңесінің мүшелері, бұқаралық ақпарат құралдарының өкілдері қатысты.
Жақсыбай САМРАТ,
«Егемен Қазақстан».
