Облыс әкімдігінің баспасөз қызметі келтірген дерекке жүгінсек, жаңа спорт кешенінің құрылысы «Ауыл – Ел бесігі» бағдарламасы аясында жүргізілген. Жобаның құны – 446 млн 774 мың теңгені құрайды. Екі қабатты ғимаратта ауыл балаларының күрес, бокс, футбол, баскетбол, волейбол секілді спорт түрлерімен шұғылдануына барлық мүмкіндік қарастырылған.
Жалпы алғанда Жамбыл ауданында соңғы жылдары спортты дамытуға айрықша назар аударылып отыр. Жергілікті атқарушы билік өкілдерінің айтуынша, алдағы уақытта Тастөбе ауылында да дәл осындай спорт кешені бой көтереді.
Ресми дерекке сүйенсек, өткен жылы Жамбыл облысында 115 спорт нысаны пайдалануға берілген. Оның ішінде 9 дене шынықтыру –сауықтыру кешені, 3 спорт кешені, және 103 спорт алаңшасы бар. Аталған спорттық нысандардың кейбірі демеушілер есебінен салынған. Атқарылған жұмыстың нәтижесінде өңір халқының спорттық инфрақұрылыммен қамтылуы 68,3 пайызға жеткен. Қазіргі кезде облыс халқының 41,2 пайызы бұқаралық спортқа тартылған.
