Ә.Қастеев музейінде ұйымдастырылған «Qara jer» атты жеке көрме О.Қабөке шығармашылығынан кең орын алатын жады мен өткенді қайта қараудың ерекше алаңы іспетті. Көрменің идеясы оның жеке естеліктерінен бастау алғанымен, шалқар шабыт оны тар меншіктің шеңберінен алып шығып, кең ауқымды тарихи және әлеуметтік мәселелерді толғауға тура бағыттаған. Қылқалам шебері өзінің жұмыстары арқылы естеліктердің қалай сақталатынын, оны қайта қараудың күрделілігін, ұрпақтан-ұрпаққа қалай берілетінін баяндайды.
«Көрмедегі көңіл аударатын маңызды туынды «Әкемнің бейнесі» деп аталады. Сағыныш пен мұңға толы бұл шығарма экспозицияның кеңістігінен ауқымды орын алады. Яғни портрет құрбандыққа арналған қойдың басы бейнесімен, топырақ үйінділерінен құралған қабір инсталляциясымен және автордың перформансымен жалғасын табады. Осы кезеңде жазылған шығармалар өткір қара жиекпен көмкерілгенімен ерекше. Суретші шығармашылық жолында реализм, натурализм, кубизм, сюрреализм, символизм, метамодернизм сынды түрлі бағыттарды өзінше зерттеп, біршама ізденістер жасайды. Нәтижесінде, оның монументалды кенептерінде сары, қызыл, сұр, көк түстердің аясында орналасқан, денелердің пішінін сындыра өтетін қара жиектер легі пайда болған. Ол кенеп үстінде философиялық көзқарасы мен азаматтық ұстанымын жасырмай жайып салады. «Ақ» атты ақ-қара және сары реңктердің үйлесімінде жазылған туындысында адамның жарық дүниеге келгенінен бастап бақиға дейінгі кезеңдерін жалпылай қарастырады» дейді суретші шығармашылығының қыр-сырымен таныстырған көрме жетекшісі, өнертанушы Сандуғаш Мырзабекова.
Оралбек «Аян» атты кескіндемесін графикалық мәнерде жазып, композиция мазмұнын сұрғылт-көгілдір реңдермен ашады. Бұл – автордың түсінде көрген бұлыңғыр оқиғасының үзіндісі. Буалдыр сағым ішіндегі оқиғаны екі адамның күрделі ракурсымен шешеді. Суретші өзіне келген жайсыз аяндардан кейін, шынайы өмірде басынан кешкен қатерлі жағдайларды іштей есіне сақтап қалған сәттегі сезімін баяндайды. Ал «Тар бөлме» атты композициясында суретші өзіне тән техниканы қолданады – кенептің жазықтығын тар бөлменің кеңістігіне айналдырып, бір отбасының мүшелерін өрнектеп жайғастырады.
АЛМАТЫ
