Әрісі АҚШ, берісі көршілес мемлекеттерден арнайы ат басын бұрған мәртебелі меймандар Тараз төрінде қолөнер шеберлеріне көрсетіліп жатқан қолдауға ризашылықтарын білдіргені жадымызда. Содан да болса керек, жергілікті қолөнер шеберлері халықаралық байқауларға қатыса бастады.
Төл туындылары бірнеше мемлекеттегі әріптестері тарапынан мойындалған тараздық қолөнершілер Индонезия елінде басталған халықаралық «INACRAFT-2025» көрмесіне қатысып, ұлттық мұраны насихаттап қайтты. Белгілі мамандардың айтуынша, әлемнің бірнеше елінен майталман қолөнер шеберлері қатысатын көрменің қай кезде де бәсі биік. Бұл өз кезегінде тараздық мамандардың тәжірибе алмасуына зор мүмкіндік туғызады.
«Қолөнершілердің халықаралық көрмесі 25 жыл бойы тұрақты түрде ұйымдастырылып жүр. Индонезиядағы ауқымды мәдени іс-шараға Орта Азия, Оңтүстік Азия елдерінің өкілдері және Дүниежүзілік қолөнершілер тізіміне енген қалалардың мамандары қатысқанын айта кеткен жөн.
Қатысушы мемлекет өкілдері негізінен ұлттық бағыттағы туындыларын ұсынғанын байқадық. Сол тұрғыдан алғанда біздің шеберлердің шығармаларынан да сәйкестік байқалады.
Қалай десек те ұлттық танымынан тамырын ажыратпаған ел екенімізді таныттық деген ойдамын. Ең бастысы, көрмеге келген меймандар біздің қолөнершілердің туындыларына аса қызығушылықпен қарап, олардың шеберлігіне тәнті болды. Қысқасы, біз Индонезияда қазақтың төл мәдениетін насихаттадық. Мұның бәрі мемлекеттік қолдаудың арқасында мүмкін болғанын айта кеткен ләзім. Жалпы алғанда, қолөнер шеберлеріне қай кезде де қолдау көрсетуге әзірміз», дейді Тараз қаласы әкімінің орынбасары Гүлдана Әлімжанқызы.
Делегаттардың арасында жылдар бойы ғажап туындыларымен талай мамандарды тәнті еткен Анар Бексұлтанова да бар. Оның айтуынша, төрт күнге созылған іс-шара жоғары деңгейде ұйымдастырылған. Ал көрмеге келген қарапайым халық тараздық қолөнершілердің еңбегін жоғары бағалаған.
«Біз Дүниежүзілік қолөнершілердің тізіліміне ұлттық киімдер арқылы енгенбіз. Сондықтан осы көрмеге ұлттық киімдерді және төрге ілетін тұскиіз, сырмақ, шапан, жадағай, киізден жасалған аяқкиім, баскиім, түрлі сөмкені апардық. Сарапшылар тарапынан біз апарған киімдер мен бұйымдарға зор қызығушылықты байқадық.
Жергілікті халық та мәдениетіміз бен тарихымызға қатысты түрлі сұрақ қойып, жауап алды. Қалай десек те, Индонезиядағы іс-шара біз үшін табысты болды деп айтуға толық негіз бар. Әріптестерімізбен тәжірибе алмастық, әртүрлі тақырыпта ой бөлісіп, бір жасап қалдық», дейді А.Бексұлтанова ағынан жарылып.
Тараз
