Алматы онкологиялық орталығының онколог-урологы Айкерім Омарова онкологиялық кеселдердің көпшілігі асимптоматикалық түрде дамитындықтан, асқынған кезде ғана анықталатынын айтады.
«Қуық асты безінің қатерлі ісігін дер кезінде анықтау үшін жыл сайын қуық асты безінің спецификалық антигеніне тест тапсыру қажет. Оның жоғарылауы ісік процесінің басталуын көрсетуі мүмкін. Ерте диагноз сәтті емдеу мүмкіндігін айтарлықтай арттырады», дейді маман.
Несеп-жыныс жолдарының қатерлі ісігіне бейім, қауіпті тобына 50 жастан асқан, созылмалы қабыну процестері (пиелонефрит, простатит, цистит), жаман әдеттер, семіздік, тұқым қуалайтын кеселдер, улы заттардың әсер ету жағдайында жұмыс істейтіндер кіреді.
Мәселен, 2024 жылы Алматыда 5209 қатерлі ісік ауруы тіркелді. Оның ішінде 518 жағдай несеп-жыныс жолдары обыры екендігі анықталған. Атап айтқанда, 218 – қуық асты безі обыры, 189 – бүйрек жасушалы ісігі, 111 – қуық ісігі.
«Алдын алу және дер кезінде медициналық тексеруден өту – денсаулықты сақтаудың кепілі. Егер сізде зәр шығаруда қиындық болса, зәріңізден қан көрініп, беліңіз ауырса, дәрігерге баруды кейінге қалдырмаңыз», дейді мамандар.
