Игі бастаманы «AMANAT» партиясының мүшелері қолға алып, оны «Жастар рухы» жастар қанатының еріктілері мен ауыл тұрғындары қолдады. Жалпы сенбілікке 30-ға жуық адам қатысып, бірнеше сағат ішінде 6 тонна қоқыс жинады.
Ауыл көшелерін қоқыстан тазарту – тұрғындар үшін өзекті мәселеге айналған. Әсіресе, құрылыс қалдықтары – бетон сынықтары, кірпіштер, тақтайлар мен пластик панельдердің көрінген жерде шашылып жатқаны көңілге кірбің түсіретін. Қоршаған ортаға немқұрайды қарайтын тұрғындардың кейбірі қалдықтарды арнайы орындарға шығармай, жол жиегіне немесе ашық жерлерге төге берген.
«Кейбір тұрғындар жөндеу жұмыстарынан кейін қалдықтарды кез келген жерге тастай салған. Ауылымыз ластанып, қоқыс күн санап көбейе берді. Сондықтан «AMANAT» партиясының мүшелері сенбілік ұйымдастыратынын айтқанда бірден қолдадық», дейді ауыл тұрғыны.
Экологиялық акцияның басты мақсаты – тек қоқыс жинау ғана емес, ауыл тұрғындарын қоршаған ортаға жауапкершілікпен қарауға шақыру. Ұйымдастырушылардың айтуынша, мәселені бір реттік сенбілікпен шешу мүмкін емес, ең бастысы – қоқыстың қайта жиналуына жол бермеу. Сондықтан бұдан былай ауыл тұрғындары апта сайын сенбілік өткізіп, тазалықты сақтап отыруға келісті.
«Біздің мақсатымыз – тек көшелерді тазарту ғана емес, тұрғындарға тазалық мәдениетін үйрету. Тазалық жұмыстары кезінде тұрғындар қоқыстың қаншалықты көп екенін көрді. Егер әр адам қоршаған ортаны таза ұстауға атсалысса, мұндай ластану мүлдем болмас еді», деді «AMANAT» партиясының мүшесі Бекжан Сүнбеков.
Жиналған барлық қоқыс сұрыпталып, арнайы орындарға шығарылды. Ұйымдастырушылар мұндай бастамалар ауылдағы экологиялық ахуалды жақсартуға үлес қосатынына сенімді.
