Астана қаласындағы №6 емхана 2012 жылдың қараша айында Аманат көшесінің бойында орналасқан жаңа ғимаратқа көшіп келді. Ғимарат қазіргі заманғы медициналық талаптарға сай салынған. Жаңа құрал-жабдықтармен жабдықталған. Мұндағы медициналық қызметкерлер өздерінің қалтқысыз қызметімен халықтың алғысына бөленуде. Емхана қаланың оңтүстік-шығыс бөлігінде орналасқан көпқабатты үйлер мен жеке сектор тұрғындарына қызмет көрсетеді.
– Біздің жұмысымыздың негізгі бағыты медициналық қызметтің деңгейі мен сапасын жүйелі түрде арттыру болып табылады. Емхананың емдеу-диагностикалық базасы, қазіргі заманғы құрал-жабдықтар әртүрлі ауруларды жоғары деңгейде жедел анықтауға, науқастарды сапалы емдеуге мүмкіндік береді. Емхана қуаты бір ауысымда 500 келушіге қызмет көрсетуге лайықталған. Мұнда жоғары және бірінші санатты дәрігерлер жұмыс істейді. Олар жастарға тәлімгерлік көмектер көрсетіп, жалпы жұмыс сапасының артуына ықпал етіп келеді. Қазіргі күні халық арасында жүрек-қан тамырлары аурулары, қант диабетіне шалдыққандар жиі кездесетіні белгілі. Сондай-ақ, онкологиялық аурулардың алдын алумен шұғылданамыз. Ана мен бала денсаулығын тұрақты түрде қадағалап отырамыз, – дейді емхананың бас дәрігері, медицина ғылымдарының кандидаты Сәкен Есбергенов.
Емхананың жалпы алаңы 16 мың шаршы метрге жуық 3 корпустан тұрады. Оның құрылымына терапевтік, педиатрлық бөлімшелер, әртүрлі жеке ауруларға арналған бөлімшелер, балалар мен үлкендердің тіс емдеу бөлімшесі, аурулардың алдын алу және әлеуметтік-психологиялық қызметтер кіреді. Мұнда үлкендермен қатар балалар да емделеді. Сөйтіп, емхана қазіргі күні көп салалы емдеу мекемесі ретінде дамытылып отыр.
Біз емхананың жалпы тәжірибелік дәрігерлер бөлімшесінде болдық. Бұл бөлімшеге жоғары санатты дәрігер Бейнегүл Байболова жетекшілік жасайды.
– Біздің бөлімшеде 8 дәрігер, 17 медбике қызмет етеді. 16 мыңға жуық адамға қызмет көрсетеміз. Бұл бөлімше өткен жылдың 1 қазанында құрылды. 8 айдың ішінде тіркелген халық саны біздің жүктемемізге сәйкес нормалық деңгейге шықты. Қызметке жаңа оқу бітірген жастар келсе, оларды қамқорлығымызға алып, жабылып үйретіп, тез қатарға қосамыз. Мәселен, бөлімге келген 4 дәрігердің бізде қызмет істей бастағанына бар болғаны бір жылдай уақыт болды. Әрбір ана мен бала назардан тыс қалмауы тиіс. Оның үстіне соңғы кездері скринингке – ауруларды алдын ала жедел анықтау мәселесіне көп күш жұмсаудамыз. Мұның пайдасы зор. Өйткені, өзін аурулардан саумын деп есептейтін кейбір адамдардың бойынан науқас белгілері байқалып отыр. Жалпы айтқанда, жұмысымыз жеңіл емес. Өйткені, қазіргі білімді, білікті, медициналық қызметке қояр талабы мол тұрғындардың көңілінен шығу оңай емес, – дейді Бейнегүл Батырбекқызы.
Бейнегүлдің дәрігер болып қызмет істегеніне 20 жылдан астам уақыт болған екен. Жүрек аурулары бойынша да арнайы сертификаты бар. Бірнеше рет министрліктің, басқа да ұйымдардың алғысына ие болған. Дәрігерлік парызына адалдығының, біліктілігінің нәтижесінде 2008 жылы Елбасының өз қолынан жаңа пәтер алу құрметіне бөленіпті. Қасындағы аға-мейірбике Ажар Ежебекова да жұмысқа деген жауапкершілігі, қағылездігімен көзге түсуде.
Бөлімдегі №43 учаскенің отбасылық дәрігері Азамат Байбалаевтың қызметке кіріскеніне біраз уақыт болған. Азамат келген науқастарға ілтипатпен, жанашырлықпен қарайды. Қызметінде білікті. Қасындағы мейірбикесі Гүлжан Ойысова болса, осы салада біраз тәжірибе жинақтаған. Сондықтан, олардың жұмысына науқастар тарапынан алғыстың мол екендігін байқадық. Мәселен, оған әкеліп Нұрхат, Наиль атты қыздарын қаратқан Самал Ермекбаева емхананың сайтына Азаматтың қызметіне ерекше риза болғанын жазады. «Алтын адам, өте қайырымды және кәсіптік тұрғыдан жоғары білікті. Мұндай дәрігерлердің қабылдауында болудың өзі көңілге жақсы әсер етеді», депті ол.
Емханада дәрігерлік қызметті жақсартуға бағытталған түрлі шаралар жиі-жиі өтіп тұрады. Мәселен, үстіміздегі жылдың 20 мамырында «Емхананың үздік мейірбикесі» атты байқау өтті. Мұнда мейірбикелер тест арқылы өздерінің кәсіптік біліктіліктерін сынға салды. Топтан озғандарға жүлделі орындар және бағалы сыйлықтар берілді.
Мұнда, дәрігерлердің біліктілігін арттыру мақсатында түрлі семинарлар, лекциялар, денсаулық мектептері де жиі өткізіледі.
Бір сөзбен айтқанда, Астана қаласындағы №6 емхана ұжымы халыққа медициналық қызмет көрсету, түрлі аурулардың алдын алу бағытында біркісідей жұмылып, еңбек етуде. Олар өздерінің төл мерекелеріне жақсы дайындықтармен келіп отыр.
Сұңғат ӘЛІПБАЙ,
«Егемен Қазақстан».
АСТАНА.
