Көрмеде техникалық және кәсіптік білім беру мекемелерінің студенттері өз жетістіктері мен инновациялық жаңалықтарын ұсынды. Мәселен, Еуропалық жоғары экономика, бизнес және құқық колледжі дауыс арқылы басқарылатын гуманоид робот пен ит роботты таныстырды. Оларды қонақ үйде қызмет етуге, мүмкіндігі шектеулі жандарға көмек көрсетуге және іздестіру-құтқару шараларына қатыстыруға болады. Қобда көпсалалы колледжі жиһаз жасау бойынша ағаш өңдеуден шеберлік сабақтарын өткізді. Шалқар көпсалалы колледжі киіз бұйымдарын жасау технологиясымен таныстырып, қой, түйе жүндерінен сурет салу жолдарын көрсетті. Сондай-ақ көрмеде ерекше білім алу қажеттіліктері бар жастарға арналған кәсіп түрлері таныстырылды.
Кәсіпорын өкілдері колледж басшылығы мен студенттердің арасындағы үш жақты келісімдер жасау мүмкіндігін талқылады. Көрмені Ақтөбе облысының әкімі Асхат Шахаров аралап, бәсекеге қабілетті және сұранысқа ие мамандар дайындауды күшейту мақсатында биылғы жылы өңірдегі он колледжде қайта жабдықтау жұмыстары жүргізілетінін атап өтті. Бұл сұранысқа ие жұмысшы мамандарын дайындауға жақсы серпін береді.
