Сурет: prosports.kz
Осы мақсатта Бейжің Олимпиадасының (2008) чемпионы Бақыт Сәрсекбаев Вьетнамда бапкер болып жүрген жерінен елімізге арнайы шақыртылды. Ханой қаласының құрамасында кеңесші-бапкер болып қызмет етіп, осы елдің чемпионатында ханойлық боксшылардың жеңіске жетуіне септігін тигізген жампозға Туризм және спорт министрлігі ұлттық құрама жанынан резервтік команда жасақтауды жүктеп отыр. Талдықорған төріне құрылған рингте талантымен дараланған саңлақтардан команда жасақтайтын бапкер жаттығуды енді бастамақ.
– Бұл жоба бұған дейін де іске қосылып, өз нәтижесін де берген еді. Бірақ ғұмыры келте болды. Тәжірибе үлгісіндегі команданы 1,5 жылдай ғана баптадық. Әлем чемпионы Жәнібек Әлімханұлы, әлем біріншілігінің күміс жүлдегері Тұрсынбай Құлахмет, студенттер арасында әлем чемпионы Нұрзат Сабыров сынды таланттар біз жасақтаған команда сапынан шықты. Сол үрдісті қайта жалғастырудың маңызы жоғары. Себебі әр салмақ дәрежесінде бірінші нөмірлі боксшыға бәсекелес болатын бес-алты қарсыласы жүруі керек. Ұлттық құраманың былтырғы Париж Олимпиадасында, жазғы Азия ойындарындағы шыққан биігі белгілі. Боксшылардың бұлай әлсіреуі – бәсекелестіктің жоқтығы. Өз салмағында бәсекелес болмаса спортшы өспейді, – деді Бақыт Сәрсекбаев.
Белгілі былғары қолғап шебері ұлттық құрама сапында жүргенде Бақтияр Артаев, Серік Сәпиев, Геннадий Головкин, Серік Елеуов, Қанат Әбутәліпов, Мейіржан Рахымжанов, Галиб Жафаров сынды кіл мықтылармен иықтаса жүріп шыңдалғанын атап өтті, ұлттық құрамаға қабылданған әр боксшы тек нәтижеге жету жолында тынбай еңбектенуі қажет екенін баса айтты.
– Біз жастар арасындағы ел біріншілігін әр аймақтан жиналған боксшылардың арасынан дарындыларды іріктеу мақсатында ұйымдастырдық. «Менің баламды қабылдайсың ба, мынау менің шәкіртім еді» деп қиыла хабарласқандар да жетерлік. Біз ондай келеңсіздікке бара алмаймыз. Бәрі ашық, әділ болуы керек, шын таланттың бағын ашып, жұлдызын жағу – мұратымыз. Өйткені өзім де кезінде Олимпиаданың алтын медалін жеңіп алғанға дейін талай «тар жол, тайғақ кешуді» бастан өткердім. Ұлттық құрама сапына қабылданған соң аянбай еңбектендік. Қазіргі жастардан да соны талап етемін. Таланты тас жаратын боксшылар бар, оларды шыңдауда орасан жұмыс атқару керек. Өкініштісі, қазақ бокс мектебі кейінгі 10-15 жылда қатты өзгерді, – дейді Олимпиада чемпионы.
Бір аптаға созылған жастар арасындағы ел чемпионаты барысында резерв даярлау міндетін арқалаған Бақыт Сәрсекбаев 240-қа жуық жастың арасынан кіл мықтылар іріктелгенін жеткізді. Осы боксшыларды баптап алдымен Шри-Ланкада өтетін Азия чемпионатына қатыстырып көрмек. Қай боксшыны құрлық додасына қосатынын оқу-жаттығу жиынынан кейін нақтылайтынын айтты. Бапкерлік құрамда Владимир Ким, Нұрлан Айтуаров, Ермек Ертаев, Қанат Әбутәліпов сынды білікті мамандар бар.
1996 жылдан 2016 жылға дейінгі аралықта боксшылар жазғы Олимпия ойындарынан алтын медальсыз қайтқан емес. Тек 2021 жылы Токиода, былтыр Парижде алтын медаль бұйырмады. 2028 жылы Лос-Анджелесте өтетін жазғы Олимпиадада саңлақтардың жетістігі бапкерлердің деңгейіне өлшем болмақ.
