2024-2025 жылдар аралығында Адамдарды заңсыз әкетуге, әкелуге, сатуға қарсы күрес мәселелері жөніндегі ведомствоаралық комиссияға Еңбек және халықты әлеуметтік қорғау министрлігі төрағалық етеді. Үкіметтің 2024-2026 жылдарға арналған Адам саудасына байланысты қылмыстардың алдын алу және оларға қарсы күрес жөніндегі іс-шаралар жоспары жүйелі іске асып келеді. Жоспар 55 тармақтан тұрады. Оның үйлесімді жүргізілуіне бірқатар орталық мемлекеттік, жергілікті атқарушы органдар, «Атамекен» ҰКП, басқа да ұйымдар жауапты болып белгіленген.
Еңбек және халықты әлеуметтік қорғау министрлігі жергілікті атқарушы органдармен бірлесіп адам саудасының құрбандарына арнаулы әлеуметтік қызмет көрсету, оларды жұмысқа орналастыру жөніндегі іс-шараларды орындайды. Әлеуметтік кодекске сәйкес, адам саудасының құрбандарына арнаулы әлеуметтік қызметтің кепілдендірілген көлемі, оның ішінде әлеуметтік тұрмыстық, медициналық, психологиялық, педагогикалық, еңбек, мәдени, экономикалық, құқықтық қызметтер көрсетіледі. Қызмет көрсету мерзімі – 6 ай. Егер қылмыстық іс аяқталмаса немесе азамат медициналық ұйымда стационарлық емдеуде болған жағдайда мерзімді 9 айға дейін ұзартуға мүмкіндік бар.
Елімізде адам саудасының құрбандарына арнаулы әлеуметтік қызметтер көрсететін 13 дағдарыс орталығы жұмыс істейді. Оның ішінде мемлекеттік секторда Абай облысы, Шымкент қаласында бір-бір ұйымнан бар. Мемлекеттік әлеуметтік тапсырыс шеңберінде Ақмола, Ақтөбе, Жамбыл, Жетісу, Қарағанды, Қостанай, Қызылорда, Солтүстік Қазақстан, Түркістан (2 ұйым) облыстарымен қатар, Астана қаласында орталықтар жұмыс істейді.
Жұмыспен қамту барысында адам саудасының құрбаны болған азаматтар «Бастау Бизнес» жобасы шеңберінде кәсіпкерлік негіздеріне онлайн оқуға, халықтың әлеуметтік осал топтарына берілетін 400 АЕК дейінгі грант алуға, «Жастар практикасы», «Алғашқы жұмыс орны», «Ұрпақтар келісімшарты» секілді жобалардан бөлек, қысқа мерзімді кәсіптік оқуға қатыса алады. Бұл ретте жұмыспен қамтуға жәрдемдесудің барлық шаралары өтініш сипатында орындалатынын атап өткен жөн. Мүмкіндікті пайдалану үшін ел азаматтары тұрғылықты жері бойынша мансап орталығына хабарласуы қажет. Бұл жағдайда зорлық-зомбылық немесе адам саудасының құрбаны мәртебесін көрсету талап етілмейді. Барлық қызмет «құпия» негізінде, мән-жайларды қосымша нақтылаусыз ұсынылады.
