Қарағандыда «Абай бол, жалған ақша» шарасы өтті

ҚАРАҒАНДЫ. 19 маусым. Облысы бойынша Мемлекеттік кірістер департаментінің экономикалық тергеулер қызметі Ұлттық банктермен бірлесіп «Абай бол, жалған ақша» тақырыбында дөңгелек үстел отырысын өткізді. Оған екінші деңгейлі банктердің өкілдері қатысты. Бұл туралы облыстық мемелкеттік кірістер департаментінің баспасөз қызметіне сілтеме жасаған egemen.kz тілшісі хабарлады. Жиында қатысушылар аймақта жасырын түрде ақша белгілерін шығару мен айналымға енгізу саны артқанын айтты. Мәселен, Қылмыстық кодекстің 231-бабы (жасанды ақшалар мен құнды қағаздарды жасап шығару, сақтау, қозғалысқа түсіру және өткізу) бойынша жыл басынан бері 31 қылмыстық іс тіркелген. Сонымен қатар, мамандар жыл басынан бері айналымға заңсыз 36 ақша бірлігі түскенін анықтаған. Әсіресе, 2000 теңгелік қолдан жасалған жалған ақша жиі кездесетінін мәлімдеді. Айта кетейік, шарада банк өкілдері мен құқық қорғау саласының қызметкерлері жалған ақшаны жою, күдіктілерді ұстау бағытында бірлесіп жұмыс қажеттігін тарқатты. Сондай-ақ, ақша белгілерінің шынайылығын мұқият тексеру үшін екінші деңгейлі банктерге қазіргі заманғы қондырғыларды қолдану жөнінде ұсыныстар берілді. Айқын Несіпбай. Дерек: облыстық мемелкеттік кірістер департаментінің баспасөз қызметі. Сурет: businessnews.kz.