Өңірдің сегіз жүйрігі мен еліміздің әр қиырынан келген сегіз ақын сынға түсетін формат биыл біршама өзгеріпті. Бұл жолы ақын атындағы өңірден төрт үздік айтыскер топқа түссе, басқа облыстардан он ақын жыр аламанында бақ сынауға мүмкіндік алды. Жеті жұпқа жіктелген айтыс ақындарының өнерін есімі елімізге белгілі қаламгерлер бағалады. Елдік пен бірлікті, татулық пен кісілікті жырлаған жыр жүйріктерінің сөз сайысы әдеттегідей әдемі әзілдермен әдіптелгені көрермен үшін үлкен олжа болды.
Баласағұн атындағы орталық концерт залында шымылдығы түрілген айтысты шығыстың екі ақыны Рүстем Қайыртай мен Серік Қуанған бастап берді. Шығыс Қазақстан облысынан келген Серік Әулиеата өңірінің терең тарихы мен бүгінін шырайлы шумақтарымен шынайы жырласа, талай айтыста топ жарған Абай облысының ақыны Рүстем Қайыртай да қарсыласынан бір мысқал кем түскен жоқ. Жайықтың жағасынан келген қазақтың ерке қызы Жансая Мусина мен жамбылдық Әсет Дүйсебаев арасындағы сөз сайысы әдемі әзілмен әдіптеліп, көпшіліктің көңілін көтерді.
Жалпы алғанда, жеті жұпта сынға түскен айтыскерлердің қай-қайсысы болсын жақсы дайындықпен келгені байқалып тұрды. Жылтыр сөзден жырақ болған ақындардың өзара сөз қағыстыруы, жыр алыбы Жамбылдың бейнесін, еңбегі мен ерлігін қара өлең өлшеміне сыйдыруға тырысуы тыңдарманның жүрегіне жетті деуге болады.
Жыр додасының қорытындысында сөз алған қазылар алқасының төрағасы Жүрсін Ерман Әулиеата төрінде дәстүрлі түрде ұйымдастырылып келе жатқан «Жамбыл – менің жай атым, халық – менің шын атым» атты республикалық айтыстың жоғары деңгейде өткенін атап өтті.
«Тараз төрінде жоғары деңгейде ұйымдастырылған жыр додасына куә болдық. Айтысқа қатысқан ақындар жыр алыбы туралы тамаша шумақтарымен дараланғанын айта кеткен жөн. Бір сөзбен айтқанда, жүйрік ақындарымыз тақырыпты барынша ашуға тырысып бақты. Республикалық айтысты тұрақты түрде өткізіп келе жатқан жергілікті атқарушы билікке алғыс айтамыз. Қазақтың қасиетті өнері мәңгі жасасын», деді ол өз ойын түйіндеп.
Әулиеата төрінде өткен аламан айтыстың қорытындысында бас жүлде (1 млн 700 мың теңге) Шығыс Қазақстан облысының ақыны Серік Қуанғанға бұйырды. Ал жүлделі бірінші орынға Сыр өңірінің жүйрігі, белгілі айтыскер Мұхтар Ниязов лайық деп танылса, Батыс Қазақстан өңірінен келген Жансая Мусина екінші, астаналық Мұхтар Қонарбаев үшінші орын иеленді. Бұған қоса төрт арнайы жүлде өз иесін тапты. Бауыржан Момышұлы атындағы жүлде алматылық Шұғайып Сезімханға, Ұлбике ақын атындағы жүлде жамбылдық Әсет Дүйсебаевқа, Кенен Әзірбаев атындағы жүлде абайлық Рүстем Қайыртайға, Әзімбек Жанқұлиев атындағы жүлде павлодарлық Рауан Қайдарға бұйырды.
Республикалық айтыстың қорытындысында сөз сөйлеген облыс әкімінің бірінші орынбасары Нұржан Календеров Тараз төрінде тамаша өнер көрсеткен айтыскер ақындарға, олардың өнеріне баға берген қазылар алқасының мүшелеріне алғыс айтты.
«Он жылдан астам уақыт бойы тұрақты түрде ұйымдастырылып келе жатқан жыр аламаны көпшіліктің көңілінен шықты деген ойдамыз. Еліміздің әр қиырынан келген танымал ақындардың тамаша шумақтарына жергілікті көрермен дән риза болып, қошемет көрсеткенін көз көрді. Сол үшін осы айтысқа арнайы келген жүйріктерімізге шын жүректен ризашылығымды білдіремін. Атадан балаға мирас болып жалғасқан қазақтың қасиетті өнері жасай берсін», деді ол.
Жамбыл облысы
