Күрделі операция сәтті өтті

Ақ халатты абзал жандар­дың көме­гіне жүгінген 66 жас­тағы қала тұрғынының жағ­дайы мәз емес еді. Халі мүш­кіл ­нау­қастың жағдайын толық­қанды тексерген дәрігерлер оған «оң жақ орта ми артерия­сын­дағы аневризма» деген диаг­ноз қойған. Бұл дертті емдеу­де арнайы әдіс­терді қолданудың маңызы зор.

Дәрігерлер келтірген дерекке жүгінсек, әдетте аневризманы клипс (қысқыш) орна­тып, ашық орта арқылы емдейді. Алайда ауруханаға түскен тұр­ғынның жүрегінде дерт бар болғандықтан, операция­ны басқа тәсіл арқылы жүзеге асыру қажеттігі туындаған. Тәуекелге бел буған ақ халаттылар операцияны қан тамыр­лары арқылы, жергілікті анес­тезиямен жүзеге асыруға мәж­бүр болған.

«Ангиографиялық су­­ре­т­­­тер­ден стент анев­­риз­маның мойнына орналас­ты­рыл­ғанын анық байқауға болады. Әлден уақыттан кейін стенттің ішіне микроспираль енгізілді. Нәти­жесінде, аневризма аумағы толыққанды жабылды. Опе­рацияны жасамас бұрын Ита­лиядан келген білікті сарапшылармен кеңестік. Мұндайда жан-жақты ақылдасқан маман­дардың пікірін білген жөн. «Жеті рет өлшеп, бір рет кес­кеннен» кейін ғана тәуекел­ге бел буған абзал. Жылдар бойы жиналған тәжірибенің ар­қасында күрделі операция­ны сәтті жасадық деуге негіз бар. Ешқандай асқыну болған жоқ. Қысқасы, қол­дан келген мүмкіндіктің бәрін қа­растырдық», деді Тараз қала­лық ауруханасының нейрохирургия бөлімінің меңгерушісі Нұржан Әйтімбетов.

Операцияны нейрохирург Еркебұлан Меркібеков пен Болат Кеңшілік жасады. Дәрігерлердің айтуынша, аневризманы толық жабу үшін «pConus» аталатын арнайы стент-шатыр қолданылған. Бұл құрылғы аневризманың мойнын жаппай, сол жердегі қан тамырларын бастапқы қалыпта сақтауға мүмкіндік туғызады. Стент аневризманы барынша қорғап, микроспираль арқылы оны толықтай жабуға мүмкіндік береді.

«Науқастың бойынан еш­қандай нев­рологиялық мәсе­ле байқалған жоқ. Келесі күні еркін қозғалып, бөлмеде өзі жүрді. Алдағы уақытта қан ұйып қалмас үшін сақтан­ған­ның артықтығы жоқ. Сон­дық­тан мерзімі алты айды қамти­тын арнайы ем-дом шарасы та­ға­йындалды. Жарты жыл ішін­де стент толыққанды жа­была­ды. Содан соң тағайындал­ған дәрі-дәрмекті қабылдау мер­зімі тоқтатылады», дейді
дәрігерлер.

Дәрігерлердің дер кезінде арала­суының арқасында күр­делі аневризма экно­васку­ляр­лық әдіспен жабылды. Нау­қас­тың жағдайы дер кезінде қал­пына келді. Жоғары білікті мамандар заманауи техниканы қолдана отырып, күрделі операцияны сәтімен жүзеге асырды.

Тараз