Солтүстік Қазақстанда жергілікті үлесті арттыру мәселелері талқыланды

ПЕТРОПАВЛ. 19 маусым.  Солтүстік Қазақстан облысы әкімінің орынбасары Ерлан Әукенов пен «Еуразиялық топ» ЖШС басқармасының орынбасары Алдияр Қазтаевтың кездесуінде серіктестіктің отандық тауар өндірушілерге тапсырыстар орналастыру есебінен жергілікті үлесті қолдау және арттыру мәселелелері кеңінен сөз болды. Бұл туралы облыстық әкімдіктің баспасөз қызметі хабарлады. Кеңеске аймақтың ірі кәсіпорын, агроқұрылым өкілдері қатысты. Олар кәсіпорындарды жүктеу бойынша шаралар жоспарын іске асыру аясында ірі компаниялармен ұзақ мерзімді келісімдер орнату шаралары атқарылып жатқанын жеткізді. Ерлан Әукенов жиынға қатысушыларды өңірдің өнеркәсіп әлеуетімен таныстырды.  Бүгінгі күні 49 машина жасау кәсіпорнының 28-і мұнай-газ, теміржол және тау-кен секторлары өнімдерін шығарумен шұғылданады. Инновацияларды енгізу бойынша жүргізіліп жатқан жұмыстар өнімдер шығаруда импортты алмастыруды жоғары деңгейде қамтамасыз етуге мүмкіндік береді.  Өндіріске ең соңғы технологиялар енгізу жөніндегі ұсыныстар қолдауға тұрарлық. Мәселен, «Петропавл ауыр машина жасау зауыты» АҚ энергетикалық қазандық жабдықтарын, қосалқы бөлшектерді, «Нүкер» ЖШС күштік тиек-пломбалау құрылғыларын, «Изолит» ЖШС - лак маталарын, ЛСЭП - 934-ТПЛ әйнек-слюда лентасын, «Петропавл құбыр зауыты» татқа қарсы изоляциялық жамылғысы бар құбырлар және сыртқы диаметрі 820 мм-ге дейінгі жылуизоляциялық жамылғыны, «Тез салынатын ғимараттар мен құрылыстар» ЖШС «сэндвич» - панельдер, С-тәрізді болат профиль, профлист жеткізуге дайын екендігі айтылды. Өмір Есқали. Дерек: Солтүстік Қазақстан облыстық әкімдігінің баспасөз қызметі. Сурет: egemen.kz