– Ұлттық құрама сапына 16 жасымда өттім. Ол кезде құраманың бас бапкері қызметін Вадим Присяжнюк атқаратын. Ағайымыз бізді рингте төреші қолыңды көтермесе «жеңдім» деп дауласпа деп үйретті. Былтыр Таиландта өткен Азия чемпионатының жартылай финалында өзбек боксшысына есе жібердім. 1-раундта бес төреші де менің басым қимылдағанымды бағалайтын шығар деп пайымдадым. Бірақ керісінше, 2,3-раундтарда оны қуып жүріп соққы дарытқаныммен де төрешілер жеңісті соған жазды. Бұйырғаны қола жүлде болды.
Олжас Сәттібаевқа ұзатылып, шаңырақ құрған соң 14 жыл спорттан қол үздім. Осы жылдар ішінде 5 бала өмірге келді. Кенже қызымыз ширап, ес кірген соң әкем Бауыржан Асқаровтың ассистенті болып бапкерлікке бет бұрдым. Бірақ өзім де әлі қажыр-қайратымды сынап көрсем деген ішкі байламым Азия чемпионатына қатысуыма себеп болды. Әр жекпе-жекке шығып бара жатқанда өңім емес, түсім секілді сезіндім. Бес баланы өмірге әкеліп, бірнеше жыл үзілістен кейін қайта түлеп, бабыма ену мүмкін еместей көрініп еді, дейді батыр ана.
Әйгерім тұңғыш қызы мен оған тете ұлды өмірге әкелгеннен кейін қолғабын қайта киеді. Тіпті олимпиадалық 51 кг салмақта көшбасшы болды. Жазғы Олимпиада додасының жолдамасын олжалайтын да орай туған. Бірақ жолдасы Олжастың тілеуін тілеп шаңырағында отырып жанкүйер болуға тоқтады. Талантты боксшы Олжас Сәттібаев Рио жазғы Олимпиадасына лицензия еншілеп, төртжылдық додасында ширек финалда сүрінді.
– Келешекте қыздарымның бірі менің жолымды таңдап, боксшы боламын десе, бетін қақпаймын. Былтырдан бастап әйелдер де дулығасыз жұдырықтасатын болды. Бұл бұдан былай соққының ауырлығы да артады деген сөз. Бұрын дулыға айтарлықтай қорғаныш еді, – дейді боксшы.
Әйгерімнің әкесі Бауыржан Асқаров – білікті бокс бапкері. Қызын балдырған шағынан боксқа баулыпты. Алдымен, қыздар боксының үйірмесі болмағандықтан, дзюдо күресіне жібереді. Бірақ бокс спортын қыздар арасында да дамыту қолға алынғанда, бірден осында ауыстырады. Содан бері Әйгерім қолғабын шешкен жоқ. Тек келін атанған соң, сегіз жылдық үзілісте бес баланы өмірге әкелді.
– Әлі есімде, 2004 жылы Афина жазғы Олимпиадасының финалына екі боксшымыз шықты. Геннадий Головкин 75 кг салмақта күміс медаль алса, Бақтияр Артаев 69 кг салмақ дәрежесінде Олимпиада чемпионы атанды. Сонда әкем мені қасына шақырып, боксшыларымыздың жекпе-жектерін бірге тамашалайтынбыз. 13 жастағы ойын баласы болсақ та, боксшыларымыздың әр жеңісіне ерекше қуанып, жанкүйерлік таныттық. Ұзақ жылғы үзілістен кейін спортқа қайта оралғанда байқағаным, қыздар боксында жаңашылдық артқан. Ертеректе бізді бұлшық етіміз қатайып кетеді деп, залда темір көтеруге аса жақындата қоймайтын. Қазір керісінше, функционалдық, физикалық дайындыққа баса мән беріледі. Өйткені әлемде әйелдер боксы осыны талап етеді, – дейді.
2011 жылы тұрмысқа шыққанда жеке бапкері Ермек Ертаев қатты ренжіпті. Күтпеген жаңалықты естігенде абдырап қалады. Өйткені шәкіртін Олимпиада додасына қоссам деп, барын салып әзірлік жасаған еді. Бірақ кейін ақ батасын берді. Бес баланы өмірге әкеліп, ұзақ үзілістен кейін қайта оралғанда ол кісі де ерекше қуанды.
– Біздің үйіміз жаттығу залының дәл іргесінде, қоңсылас орналасқан. Тер сіңген залдың аурасы мүлдем бөлек. Аяғым ауыр кезде залды сағынып, шыдамай жиі баратын едім, боксшылардың әзірлігін тамашалайтынмын, – деген Әйгерім өмірін спорттан тыс елестете алмайтынын жеткізді.
Былтыр Қарағандыда әйелдер боксынан «Мықтылар турнирі» өтті. Сол сынға Әйгерімнің әкесі Бауыржан Асқаров та шәкірттерін үкілеп әкеп қосты. Көпбалалы ана, боксқа қайта оралған Әйгерім де осы турнирде бақ сынауға барды. Рингке жеке бапкері Ермек ағайы ертіп шықпақшы болды. Әкесі де қызына секундант болғысы келетінін білдірді. Бірақ Әйгерім келісім бермеді. Әке де ет пен сүйектен жаралған адам, қызының қарсы болғанына ренжіді.
– Жекпе-жекте жеңіске жетіп, рингтен түскенде әкемнің құшағына еніп кеттім. Сөйтіп, неге қарсы болғанымды айттым. Мен ес білген шағымнан әкеме қатты жақын болдым, еркелеп өстім. Бес баланың анасы болсам да, әлі күнге әкеме еркелеймін, назымды айтамын. Егер ол кісі секундант ретінде рингке шықса мен босаңсып кетуім бек мүмкін, мүмкін емес-ау, солай болатын да еді. Осыны айтып едім реніші басылып, маңдайымнан сүйді, – дейді батыр ана. Жуырда Болгарияда өткен «Странджа» турнирінен боксшыларымыз олжалы оралды. Үздіктердің арасында күміс жүлде алған Әйгерім де бар.
