Жыл басы болуға таласқандардың арасынан түйенің үстіне өрмелеп шығып, жаңа жылды бірінші болып көретін айлакер тышқанның ақылы мен қулығына құрылған әдепкі ертегіден алшақ кетіп, жаңа пішінге бой ұрған бұл қойылым шым-шытырық оқиғалар мен таңғаларлық түрлі кейіпкерлер арқылы ғасырлардан мұра болып сақталған рухани құндылықтар, қазақы таным-түсінік, ұлттық салт-дәстүр, наным-сенімдерді дәріптейді. Көктем мерекесінің шырайын келтіріп, маңызын арттыратын мерекеде аңызға айналған кейіпкерлер – Қыдыр ата, Күн мен Түн, Тышқаннан бастап Доңызға дейінгі жыл иелері көрермендерге ұлттық ойындар мен билер ұсынып, Наурыз мейрамының мәнін ашып көрсетеді.
– Наурыздың басты құпиясы Күн мен Түннің теңесуі болса, бір-бірімен кеңесіп жыл басын таңдауында әр жылдың айтар ойы, жүрекке жеткізер сыры, жадыдан өшпейтін ғибраты болған. Инсценировка авторы Жазира Ахметовамен кеңесе отырып, ертегіні жаңаша шешіммен ұсынуды жөн көрдік. Жыл он екі айдың бәрі сахнаға ұлттық киіммен шығады. Спектакль + 5 жастан жоғары көрерменге арналған. «Адам жеті жыл өмір сүреді, қалған уақытта балалық шағын іздеумен өтеді» дейтін тәмсіл бар емес пе? Алматы Қуыршақ театры – адамға сағыныш сыйлайтын театр. Ән мен күйге бай ұлтымыздың өнерін мейлінше жарқырата отырып, құлаққа сіңген белгілі күйлерді заманауи өңдеумен қайта жаңғыртып, қойылымды қызықты жасаудың тәсілдерін табуға тырыстық. Интерактивті сауалдар қойып, көрерменді спектакль оқиғасына тікелей араластырып отырамыз. Сондай-ақ қылыштасу, әтештің таңғы шақыруы, өгіздің соқа тартуы, қойдың жүнінен киіз басуды пластикалық шешімдермен көрсете отырып, жан-жануардың мифологиялық маңызы мен тұрмыстағы көл-көсір пайдасын, өзге де ерекшелігін балалардың санасына сіңіруді мақсат еттік, – дейді «Наурыз құпиясының» режиссері Шоқан Құлназаров.
Жаңа жыл иесі атануға таласқан жануарлар артықшылықтары мен жақсы қасиеттерін алға тартып, шапшаңдығы мен тапқырлығы сынға түсетін өнер сайысын ұйымдастырады. Әділ шешім шығаруға бел байлаған Күн мен Түн байқау жариялап, жануарлардың ақылдылық, айлакерлік, шапшаңдық, тапқырлық қасиеттерін сарапқа салады. Тартысты бәйгенің жеңімпазын бірге анықтауға шақырады. Бұл спектакль мерекелік бағдарламаның көркін кіргізіп, көрерменге ұмытылмас әсер сыйлайды. Спектакль кішкентай көрермендерді достыққа, адалдыққа, бірлікке, ұлтжандылыққа үндейді.
АЛМАТЫ
