«Мекке, Мәдинам менің!»

Қазақстанның еңбек сіңірген қай­рат­кері, Президент сыйлығының лауреа­ты, журналист-жазушы Қайсар қажы Әлімнің осылай аталған кітабында («Фо­лиант» баспасы, Астана, 2015 ж.) Мекке, Мәдинаға жасаған қажылық сапары (07-29.10.2013 жыл) туралы баяндалады. Автордың жалпы имандылық құн­­дылықтарына негізделген ой-пайымы, мақсат-аңсары, көрген-білгені, түйсік-түйгені, сезім-сыры кітаптың алтын арқауына айналған. Бұл кітаптың жазылу сырын автор алғы сөз ретінде берілген «Жүрек сөзі» немесе жолай жоғалған жүгімнің Алланың құдіретімен қолыма тұтас­­тай табысталғаны туралы» деген аңдат­пасында айқындап түсіндіріп өтеді. Астана әуежайында жүгінің бір бөлігі ғана қолына тиеді... Екінші бумасы жоқ боп шығады. Сол жүгінде – Құранның сувенирлік кітаптары, Қағба бейнеленген кілемшелер, жайнамаздар, тасбихтар секілді сый-сияпаттары бар болатын. Сондай-ақ, жанын өксіткені – ықтияттап жүргізген күнделік-қолжазбасы да сол қапшықтың ішінде қалған еді... «Сол күнделік-қолжазбам қайт­пағанда, бұл кітабым – қажылық пайымым қалай жазылар еді деп, күңіреніп, іле тәубеме келемін! Жазылар-ау, бірақ ізін суытпай дәптеріме түрткен, деректердің дәлме-дәлдігі, тулаған сезім ұшқыны, имандылық иірімі, тазарған жүрек сөзі, бәрі-бәрі айна қатесіз сол күйінде тіл ұшына оралар ма еді, оралмас па еді...» – деген қаламгердің сабаға түсірген сөзі оқырманды да ауыр ойлардан арылтып алғандай әсер етері сөзсіз. Сонымен, жақсы кітап өмірге келіпті. «Мекке», «Мәдина» бөлімдерінен тұратын қажылық сапардың әр күні жүрекжарды имандылық иірімдеріне толы екен. Мазмұны суреттермен байытыла түскен. Нұрбек СӘБИТОВ.