Қарағайлы ықшам ауданында салынған №51 білім ордасының ашылу салтанатына облыс әкімі Берік Уәли, «Самұрық Қазына констракшн» АҚ басқарма төрағасы Мәулен Айманбетов, білім саласының ардагерлері, ақсақалдар және ата-аналар қатысты.
Облыс әкімдігінің баспасөз қызметінің дерегінше, жаңа да жайлы мектепте оқушылардың жан-жақты білім алуына барлық жағдай жасалған. Заманауи жабдықтармен толық қамтамасыз етілген білім ордасында 65 сынып-комплект бар. Оның ішінде екі мектепалды даярлық сыныбы жұмыс істейді. Мектепте 100-ге жуық педагог еңбек етеді.
Жаңа мектеп 33 оқу кабинетімен қатар, үш информатика кабинеті, робототехника сыныбы, STEM зертханасы, графика және модельдеу, мультимедиа, визуалды өнер пәндік кабинеттерімен жабдықталған. Сондай-ақ «үй мәдениеті» мен «тамақтану мәдениеті» шеберханалары қарастырылған. 250 орындық акт залы, 338 орындық асхана, ресурстық орталық пен кітапхана, екі спорт залы, екі футбол алаңы оқушылардың шығармашылық, интеллектуалдық, спорттық тұрғыдан дамуына мүмкіндік мол.
Аймақ басшысы жаңа мектептің ашылу салтанатында сөйлеген құттықтау сөзінде білім ордасының Қарағайлы ықшам ауданы үшін ғана емес, қала тұрғындары үшін маңызы зор екенін айтты.
«Өздеріңіз жақсы білесіздер, Мемлекет басшысы өз Жолдауында «Әрбір оқушының білім алып, жан-жақты дамуы үшін қолайлы жағдай жасалуға тиіс» деп «Жайлы мектеп» ұлттық жобасын жүзеге асыруды тапсырған болатын. Бүгін, міне, осы жоба аясында Абай облысындағы алғашқы мектепті пайдалануға беріп жатырмыз. Оқушылар мен ата-аналар бұл күнді асыға күтті. Біз де әкімдік тарапынан мектептердің тезірек, төртінші тоқсанда пайдалануға берілуіне күш салдық. Бұған дейін қаланың басқа мектептеріне қатынап оқыған оқушыларға тамаша тарту жасадық деп ойлаймын. Білім ордасының барлық ұстаздары мен оқушыларына үздік жетістіктер мен жарқын болашақ тілеймін. Жаңа да жайлы мектеп құтты болсын», деді облыс әкімі.
Аймақ басшысының айтуынша, облыста «Жайлы мектеп» ұлттық жобасы аясында 5 мектеп салу жоспарланған, жаңа оқу жылында Семей қаласы мен Аягөз қаласында тағы екі білім ордасы пайдалануға беріледі.
Облыс әкімі ашылу салтанатынан соң қонақтармен бірге мектептің кабинеттері, кітапханасы, зертханаларын және шеберханаларын аралап, спорт залдары мен футбол алаңын көрді. Оқушылармен, мұғалімдермен пікірлесіп, жаңа мектептегі жаңа қадамдарына сәттілік тіледі.
Оқушылардың ата-аналары жаңа ықшам ауданның екінші мектеппен толыққанына ризашылықтарын жеткізді.
«Жаңа мектептің салынуы Қарағайлы тұрғындарының көптен бергі арманы еді. Ықшам ауданның ата-аналары балаларын қаланың түкпір-түкпіріндегі мектептерге түрлі көлікпен тасып, қиналып жүретін. Өйткені, Қарағайлыда жалғыз ғана мектеп болды. Бүгін осы мәселе шешімін тауып, қуанышқа бөленіп отырмыз. Жаңа мектепте оқушыларға не керектің бәрі бар. Барлық жағдай жасалған. Осындай мектеп салып бергені үшін Президентімізге алғыс айтамыз», деді Қарағайлы ықшам ауданының тұрғыны Бақтылы Қанафина.
Бұдан кейін аймақ әкімі Берік Уәли, «Самұрық Қазына констракшн» АҚ басқарма төрағасы Мәулен Айманбетов Бесқарағай ауданындағы «Жайлы мектеп» ұлттық жобасы аясында салынған 300 орындық мектептің ашылу рәсіміне қатысты. Салтанатты жиынға білім саласының ардагерлері және ата-аналар қатысты.
Онда да оқушылардың жан-жақты білім алуына барлық жағдай жасалған. Заманауи құрал-жабдықтармен қамтылған оқу орнында қазір 57 мұғалім еңбек етеді. 22 оқу кабинеті, мультимедиалық және жаратылыстану-ғылыми пәндерге арналған зертханалар, спорт және шығармашылық үйірмелері жұмыс істейді. 120 орындық асхана, 100 орындық мәжіліс залы, интерактивті панельдер, пәндік кабинеттер, кітапхана, оқу залы бар. Спортпен шұғылдануға арналған залдар мен ашық алаңдар, воркаут аймақтары, домбыра үйірмесі сияқты қосымша білім беру бағыттары қарастырылған. Ерекше білім беру қажеттіліктері бар балаларға арналған инклюзивті орта да ескерілген: пандустар, тактильді жолдар, арнайы санитарлық тораптар орнатылған.
Аудан орталығындағы Қайрат Рысқұлбеков атындағы орта мектептің оқушылары бұған дейін балабақшаға бейімделген ғимаратта оқып келсе, енді олар жаңа мектепке білім алады.
Аймақ басшысы мектептің ашылу салтанатында сөйлеген құттықтау сөзінде білім ордасының Бесқарағай ауылының тұрғындары үшін маңызы зор екенін жеткізді.
«Мемлекет басшысы атап өткендей, әрбір оқушының сапалы білім алуына мемлекет тарапынан қазіргі таңда барлық жағдай жасалып жатыр. «Жайлы мектеп» жобасы ел игілігіне, білім мен ғылымды шыңдауға бағытталған бағдарлама. Бүгін, міне, облысымызда екі бірдей жаңа мектеп пайдалануға берілді. Бұл оқушылар үшін, ата-аналар үшін, мұғалімдер үшін үлкен мереке, айтулы күн. Біз бұл бағыттағы жұмысты жалғастыра береміз. Өңірдегі мектептер кезең-кезеңмен жаңғырып, жаңартылады», деді облыс әкімі.
Аймақ басшысы ашылу салтанатынан кейін қонақтармен бірге мектептің кабинеттері, кітапханасы, зертханаларын және шеберханаларын аралап, спорт залдары мен футбол алаңын көрді. Оқушылармен, мұғалімдермен пікірлесіп, жаңа мектептегі жаңа бастамаларға сәттілік тіледі.
АБАЙ ОБЛЫСЫ