Мұқтаж отбасыларға көмек көрсетіледі

Облыстық жұмыспен қам­туды үйлестіру және әлеуметтік бағдарламалар басқармасының мәліметінше, цифрлық карта негізіндегі өлшемге сәйкес өңірдегі 508 414 отбасының 10 002-cі, яғни 2%-ы ғана жақсы деңгейде. Отбасының әлеу­мет­тік әл-ауқат деңгейін баға­лайтын цифрлық карта негізін­де өңірдегі 165 712 отбасы немесе 32,6%-ы В санатында, яғни қанағаттанарлық жағдайда. 181 067 отбасының (35,6%) әлеу­меттік әл-ауқаты төмен. Дағ­дарыс және мүшкіл деңгей саналатын D, Е санаттарында 151 633 отбасы есепке алынған, олардың үлесі 29,8% болып отыр. Сондай-ақ облыс бойынша жарналары мен ауда­рымдары жоқ 18 455 жеке кәсіп иесі бар. Олардың үлесі 3,8%-ды құрайды. Өңірде мекенжайы бойынша тіркелген, алайда мүлдем тұрмайтындар саны – 23 887, бұл D, Е санатындағы азаматтардың 4,9%-ын құрады. Оларды нақты тұрып жатқан тұр­ғылықты жері бойынша тір­кеуді рәсімдеу қажет.

Өңірде өмірлік қиын жағ­дай­ға тап болған отбасылар мен жекелеген азаматтарға жұмыс­қа орналастыру, кәсіпкерлік қыз­метке тарту, кәсіби дағды­лар­­ды игеру, құқықтық проб­ле­­маларды шешу, психология­лық көмек көрсету сияқты мем­ле­кеттік қолдаулар көрсеті­ліп келеді. Осы бағыттағы атқа­ры­лып жатқан жұмыстар мен жос­парлар облыс әкімі Нұ­рал­хан Көшеровтің төраға­лы­ғы­мен өткен жиында кеңі­нен талқыланып, жауапты тұлға­ларға өзектендіруге жататын азаматтарды анықтау, тиісті шаралар жүргізу жүктелді. Аудан, қала, ауыл әкімдері мен жауапты бөлімдерге осы бағыттағы жұ­мысты реттейтін нақты алгоритм ұсыну тапсырылды. Сондай-ақ облыс әкімі жұмыс орындарын көбейту, инвестиция тарту, өзіндік кірістерді ұлғайту, тұр­ғындардың әлеу­мет­тік жағ­дайын жақсартуға басымдық беру керектігін ескертті. Жыл соңы­на дейін Д, Е деңгейдегі отбасы­лар санын 137 мыңға дейін төмен­дету межеленді. Бұл ретте өндіріс орындарының ашылып, тұр­ғын­дардың жұмыспен қам­тылу деңгейін жоғарылату маңызды.

Осы орайда қолға алынып жат­қан ауқымды жобалар да аз емес. Мысалы, Созақ ауда­нын­да құрылысы басталған зауыт­та 1000-ға жуық жұмыс орны ашылмақ. «Саутс-ойл» ком­­паниясының «Созақ фосфат» инвестициялық жобасы аясында салынатын фосфор тыңайтқыштарын өндіру зауыты 2027 жылы іске қосы­лады деп межеленген. Өнім­дерін елімізбен қатар Үндістан, Қытай, көршілес елдерге экс­п­орттау мүмкіндігі де қарас­тырылған. Зауытта фосфор қалдығын өңдеу арқылы ауыл шаруашылығына қажетті тыңайт­қыштар өндірілетін бо­лады. Кәсіпорынның іске қосы­луы құрамында фосфоры бар тыңайтқыштың импорты­на тәуелділікті азайтады. Өнді­ріл­ген тыңайтқыштар мен пре­параттар елімізде азық-түлік бағасының тұрақты болуы­на оң септігін тигізері анық. Жобаның жүзеге асырушы­лары әрі серіктестері – «Саутс-Ойл» компаниясы мен «China Tianchen Engineering Corpora­tion LTD» компаниясы. Ин­дус­трияландыру картасына енгізілген жоба бойынша жос­парланған инвестиция көле­мі шамамен 140 млрд теңгені құрайды, жылына миллион тонна азот-фосфор-калий кешенді тыңайтқышын, 600 мың тонна фосфор нитратын шығарады.

Сауран ауданына қарасты Бабайқорған ауылдық округін­де салына бастаған ірі қара мал бордақылау алаңында 5000 бас ірі қара мал бордақыланып, ет, жем өндірісі, тері өңдеу бағыт­тарында жұмыс жүргізілетін болады. Құрылыс жұмыстарын келесі жылдың қазан айында аяқтау жоспарланып отыр. Нысан толық іске қосылғанда, 60-тан астам жергілікті тұрғын жұмыспен қамтылады. Кешен аудандағы ауыл шаруашылығы саласын дамытуға үлкен сер­пін береді. Мал бордақылау арқы­лы ет өндірісі көлемі артып, ішкі нарықта жоғары сапа­лы өнімдер қолжетімді бол­мақ. Со­нымен қатар тері, тыңайт­қыш өңдеу цехтарының іске қосылуы шикізатты толық пайдаланып, қалдықсыз өндіріс жүйесін ен­гізу­ге мүмкіндік береді.

Бәйдібек ауданында мақ­та өңдеу индустриясын ілгері­летуге бағытталған мақта өңдеу кешенінің жобасы жүзеге асырыла бастады. Аудан әкімі Ерлан Нұрмахановтың айтуынша, ин­вестиция көлемі 2,7 млрд теңгені құрайды. Кешеннің жылдық өндірістік қуаттылығы 60 мың тонна мақта шикізатын өңдеуге есеп­телген. Жоба іске асқан жағ­дайда 60 жаңа жұмыс орны ашы­лады.

Облыс әкімдігі жаңа жұ­мыс орындарының ашылуы жер­гілікті тұрғындардың әлеумет­тік жағдайын жақсар­тып, тұрақты табыс көзін қам­та­масыз ететініне, яғни Д, Е деңгейдегі отбасылар санын азайтуға септігін тигізеріне сенімді.

Түркістан облысы