Мысалы, жуырда қасиетті Рамазан айында ізгі амал жасауды дәстүрге айналдырған түркістандық жастар 4 бөлмелі үйді Асылбековтер отбасына табыс етті. Жылдағы үрдіс бойынша Түркістан қаласы «Бекзат» шағын ауданының 1994 жылы туған ер-азаматтары, яғни үш мектептің 150-ден аса түлегі ауызбіршілік танытып, баспана салып, оны тұрмыстық техникалармен жабдықтаған. Құрылыс жұмыстарының басым бөлігін өз күшімен асарлатып жүргізген. Жастардың арасында құрылыс жұмыстарын жетік меңгергендер белсенділік танытқан. Осылайша, жиналған қаржыны үнемдеуге, тиімді жұмсауға жағдай жасалған.
Құрылыс жұмыстары толық аяқталған соң баспанаға мұқтаж жандарды анықтауда шағын аудан тұрғындарының, қала әкімдігінің кеңесіне жүгінген. Сондай-ақ көпшіліктің ұсыныс-пікірін ескерген. Төрт бөлмелі үйді алған Құрбанәлі Серікбайұлы мен Мөлдір Фархатқызы 9 перзентімен бірнеше жылдан бері пәтер жалдап күнелтіп келген екен. Қайырымды істің шарапатын көрген отбасы жақсылыққа жаны құмар жандарға алғысын білдірді.
Баспананы табыс ету рәсіміне қатысқан ауыл ақсақалы Дәулеткерей Оспанов, Бекзат Саттархановтың анасы Сырлыкүл Адырбекқызы және ел ағалары, мәслихат депутаттары құттықтау сөз сөйлеп, ізгі тілегін арнады. Ал игі істі ұйымдастырушылардың бірі Бексұлтан Әбішов ата-бабамыз осындай қысқа жіп күрмеуге келмейтін қысылтаяң шақтарда ауызбіршілікті, адалдықты, ынтымақты ту етіп көтергенін айтады.
«Адам тағдыры ұлыс тағдырымен тығыз байланысты екенін қапысыз таныған, көптің мәселесін қара бастың қамынан жоғары қойған аға буыннан үлгі алып өстік. Бұл баспананың құрылыс жұмыстарын түгелдей өзіміз жүргіздік. Ақылдаса келе жаңа үйді көпбалалы отбасына сыйлауды жөн санадық. Баспаналы болып, төбесі көкке екі елі жетпей тұрған отбасы мүшелерінің жүзіндегі қуанышты көріп, марқайып қалдық. Көпшілікпен жиналған қаражатқа үйді заман талабына сай етіп тұрғыздық. Атсалысқан барлық азаматқа Алла разы болсын. Бұл – осы күнге дейінгі мұқтаж отбасыларына арнап салынған 18-үй», деді Бексұлтан Әбішов.
Осындай қайырымдылық істердің басы-қасында жүрген әріптесіміз Нұртас Мұхтарұлының айтуынша, Бекзат Саттарханов атындағы шағын ауданының 1982 жылы туған азаматтары 20 жылдық түлектер кездесу кешінде мұқтаж отбасына баспана сыйлап, жастарға осылайша үлгі көрсеткен. Бұған қоса 1988 жылы туған азаматтар да Әз-Наурыз мерекесі қарсаңында бір отбасының баспаналы болуына себепші болыпты. Былтыр 1993 жылғылар Ақмешіт имамына 4 бөлмелі үй табыстады. Енді келесі жылы 1995 жылғы азаматтар игі істі жалғастырмақ. Ал алдағы мамырда 1987 жылғылар тағы бір баспананы мұқтаж отбасына табыс етеді.
Тек облыс орталығында емес, барлық ауданда да жастар қайырымдылық істерімен ел алғысына бөленіп жүр. Мысалы, Төлеби ауданы Ақбастау ауылының жастары асарлатып, 7 балалы жалғыз басты әйелге үй соғып берген еді. Созақ ауданы Шолаққорған ауылындағы Ы.Алтынсарин мектебінің, Созақ ауылындағы Науайы мектебінің түлектері де тұрмысы төмен, жалғызілікті анаға үй табыс еткен. Арыс қаласының №32 Ә.Жангелдин атындағы жалпы білім беретін мектебін 2004 жылы бітірген түлектер де игі іске қолдау танытып, мұқтаж отбасыны баспаналы еткен еді.
Айта кетелік, өңірде 2018–2024 жылдар аралығында кезекте тұрған азаматтарға бюджет есебінен 16 925 (9 308 – арендалық, 7 617 – кредиттік) пәтер пайдалануға берілген. Өткен жылы 47,8 млрд теңгеге 2 590 арендалық пәтер сатып алынған. Облысқа 2025 жылы 578 арендалық пәтер сатып алуға 7,7 млрд теңге бөлінді.
Түркістан облысы
