Балаларды түнімен полиция қызметкерлері мен екі бірдей еріктілер жасағы, ұзын ырғасы 34 техника, 100-ге жуық адам іздеді.
Бүгін екі жасөспірімнің Рудныйдан шығып, Қостанай ауданына қарасты Константинов ауылына жаяу жеткені белгілі болды. Осы ауылдың маңындағы орманға түнеп шыққан балалар бүгін таңертең күре жолдың бойына шығып, жергілікті ветеринария қызметінің автокөлігіне отырған.
«Көлік иесі дереу учаскелік полицейлер Жасұлан Әбілғазы мен Махамбет Ерубаевқа хабарласқан. Олар көліктің маркасы мен нөмірін жазып алып, әріптестеріне хабар жібереді. Полиция инспекторы Нұрсұлтан Махин балалар мінген «Нива» көлігін Садовый мен Алтынсарин елді мекендерінің маңында тоқтатып, екі жасөспірімді полиция бөліміне жеткізді. Балалар ешбір зардап шекпеген. Қазір олармен ювеналды полиция қызметкерлері сөйлесіп жатыр. Жақын арада Рудныйға қайтарылады», деп хабарлады облыстық ПД-ның баспасөз қызметі.
Жасөспірімдердің бірі полиция қызметкерлеріне Қостанайда тұратын анасына кетіп бара жатқанын айтқан.
