Солтүстік Қазақстан егіншілері былтырғы астықты жинауда

ПЕТРОПАВЛ. 5 мамыр. Былтыр күздің  жауын-шашынды болуы салдарынан Қызылжар өңірінде де  маңдай термен өсірген астығын  жинай алмай, қар астында қалдырған шаруашылықтар аз емес. Күннің жылынып, жер дегдісімен олар «қыр кемелерін» егін танаптарына шығарып, қызу  еңбек  көрігін қыздырып сала берді. Бұл туралы КТК телеарнасы хабарлады. «Көктемде астық ору  өңіміз түгіл түсімізге енбеген жайт. Табиғат өктемдігіне қарсы тұрар күш жоқ.  Мамандардың айтуынша,  өткен жылы астық жинауға 12 күн ғана қолайлы болыпты. Тым болмаса,  шығынды ақтамаса да, жемазыққа жарап қалар деген үмітіміз бар.  Жоқтан жақсы ғой», дейді тәжірибелі комбайншы Владимир Долганов. Агроқұрылым басшылары  көктемде астық ору  оқиғасының осыдан жарты ғасыр бұрын орын алғанын еске алады. Кейбір шаруа қожалықтары  егінді дестеге түсіргенімен, бастыруға үлгірмепті.  Мұндайда өнімділік туралы сөз қозғаудың өзі артық.  Механизатор Владимир Остапиннің мәлімдеуінше, астық ысырабы көп. Малдың тұяғына тапталған.  Дала кеміргіштері зиян келтірген. Гектар шығымдылығы  екі центнерге ғана жетеғабыл. Жиналған астық барынша тазартылып,құс фабрикалары мен мал шаруашылығымен айналысатын  серіктестіктерге жөнелтілуде.  Ал, әлі пісіп-жетілмеген майлы дақылдарды жинау технологиясы  тіпті күрделі. Соған қарамастан астық үшін жанталасқан диқандар ел ризығын жинап алудың барлық  жолдарын қарастыруда. Шенеуніктер алқаптардың  небәрі үш пайызы ғана орылмай қалды деп есеп берген  болатын.  Қыр үстіндегі қарбалас қимылға қарасақ, сөз бен іс үйлеспейтін сықылды. Өмір Есқали. Дерек: КТК телеарнасы. Сурет: egemen.kz